कोण्डागांव. भाजपा नेता अउ राज्यसभा सांसद सुब्रमण्यम स्वामी के खिलाफ कोण्डागांव म एफआईआर दर्ज होय हे। मामला राहुल गांधी के खिलाफ अनर्गल अउ झूठा बयान दे के हरे। कांग्रेस के प्रदेश अध्यक्ष मोहन मरकाम ह कोण्डागांव थाना म रिपोर्ट दर्ज करा के स्वामी ल गिरफ्तार करे के मांग करिन हे।
सुब्रमण्यम स्वामी ह हमेशा अपन विवादित बयान ल ले के सुरखी म रहिथे अउ ये बार भी बयान ल लेके चरचा म हे. ओहर राहुल गांधी ल नशा अउ कोकीन के आदी बतात नशेड़ी कहे रहीस।
प्रदेश अध्यक्ष मरकाम ह कहिन हे कि वोहर ये परकार के टिप्पणी के निंदा करत हे. कांग्रेस कार्यकरता मन ह एखर विरोध म प्रदेश के थाना मन म रिपोट दर्ज कराही. वोहर भारतीय दण्ड संहिता के धारा 504/ 505 / 511- अउ अन्य धारा के तहत अपराधिक प्रकरण दर्ज कराए हे. जांजगीर जिला कांग्रेस ह घलोक स्वामी के खिलाफ थाना म शिकायत करत एफआईआर दर्ज करइस अउ ओला गिरफ्तार करे के मांग करे हे।
कांग्रेस ह ओखर ये बयान ल बेबुनियाद अउ बिना तथ्य के बताए हे. कांग्रेस के कहिना हे कि ये तरह के बयान ले ओखर छवि ह खराब होवत हे. ये बयान ले उंखर सम्मान अउ पार्टी के सम्मान ल आघात पहुंचे हे।
No Comment! Be the first one.