अचानकमार टायगर रिजर्व म धू-धू के जलत हे जंगल.. आगि बुझाए के कोनों व्यवस्था नई हे

जय जोहार. जानकार मन दावा करत हे कि पीछू एक महीना म छत्तीसगढ़ के अलग-अलग जंगल म साढ़े तीन हजार एकड़ ले ज्यादा जंगल इलाका आगि के भेंट चढ़ गे हे। ताजा मामला हरे अचानकमार टायगर रिजर्व क्षेत्र के लमनी, बोइरहा और कंचनपुर के जिहां लगे आगि ह हाहाकार मचा दे हे। फेर एखर बाद भी अधिकारी मन के कान म जूआं घलो नई रेंग पा हे। इहां रहवईया मनखे मन ऐ आगि ल बुझाए के जद्दोजहद करत हे।

इही महीना म टाइगर रिजर्च म आगि लगे के ऐ तीसर घटना हरे। जंगल म एक घांव फेर आगि लग गे हे। अतेक संवेदनशील इलाका म आगि लगे के ऐ घटना म खास बात ऐ हरे कि हर बार आगी लगथे फेर अधिकारी मन जानकारी नई होए के बात कहिके अपन पल्ला झाड़ लेथे। ऐ दरी आगि ह लमनी, बोइरहा और कंचनपुर क्षेत्र म लगे हे। उहां के रहवईया मन खुदे बीट कर्मचारी संग मिलके आगि ल बुजाए के प्रयास करत हे। आगि तेजी से फैलत हे अऊ ग्रामीण ओला बुझाए म सक्षम नई हे।

टाइगर रिजर्व लगे आगि ले जिहां दुर्लभ वनस्पति मन ल क्षति पहुंचत हे उहें जंगल म रहवईया वन्यजीव मन घलो अपन जान बचाए बर ऐती-ओती भागत हे। दो दिन हो गे फेर आगि म काबू नई पाए जा सकिस। उहां के ग्रामीण मन खुदे आगि बुझाए के काम म लगे हे काबर कि ए हर जादा फैसली त रिहायसी इलाका ह एखर के चपेट में आ जाहि।