कोंडागांव। कोंडागांव जिला के कन्या छात्रावास म सोमवार के रात अचानक आगी लग गे। जेकर चलते हॉस्टल म धुआं भर गे अउ दम घुटे ले 65 छात्रा बेहोश होगें। जे समय हादसा होईस, ओ समय हॉस्टल म अधीक्षिका अउ स्टॉफ दूनों गायब रिहिन।
आसपास के ग्रामीण मन छात्रा मन के चीख-पुकार सुनिन त ओमन ला बाहिर निकालिन अउ अस्पताल म भर्ती कराईन। बताए गे हे कि मीटर म शार्ट सर्किट होय के कारण आगी लगिस।
जानकारी के मुताबिक, कोंडागांव जिला मुख्यालय ले करीब 15 किमी दूर चिपावंड के उमरगांव म बीके प्राथमिक कन्या छात्रावास हे। इहां कक्षा पहिली ले पांचवीं तक के 65 झन छात्रा मन रहिथें। ये सबो छात्रा मन के जिम्मेदारी हॉस्टल अधिक्षिका अउ अन्य स्टाफ के हे।
दोपहर ले लगातार बारिश होय के कारण तकनीकी खराबी आए ले हॉस्टल के मीटर म शॉर्ट सर्किट हो गे, जेकर कारण आगी लग गे। घटना रात करीब 8 बजे के रहे।
हादसा के दौरान छात्रावास म न तो हॉस्टल अधीक्षिका रिहिस अउ न तो कोनो अन्य स्टाफ ह मौजूद रिहिस। बताए जाथे कि दूनों झन संझाती बेरा ले ही नदारद रिहिन।
हॉस्टल के आगू म गांव के कई लोगन के घर हें। ओमन नोनी मन के चीख-पुकार सुनिन त हॉस्टल पहुंचिन। जिहां ओमन देखिन कि सबो नोनी मन एक-एक करके बेहोश होवत हें। ओमन ला गांव वाला मन बाहिर निकालिन अउ अस्पताल ले जाके भर्ती कराईन।
घटना के सूचना पाके कोंडागांव सहायक आयुक्त जीआर सोरी हा रात करीब 9 बजे छात्रावास पहुंचिन। ओमन जांच के बाद कार्रवाई करे के बात केहे हें।
No Comment! Be the first one.