Corona: ए जिला म मिलिस पहला कोरोना पाजिटिव मरीज, छत्तीसगढ़ म लगातार बाढ़त हे मरीज

जय जोहार…. छत्तीसगढ़ म कोरोना (Corona) वायरस ले संक्रमित लोगन मन के संख्या ह सरलघा बाढ़त जावत हे। राज्य के ग्रीन जोन म सामिल सरगुजा जिला म पहिला कोरोना पाजिटिव मरीज ह पाये गे हे। अंबिकापुर के एक महिला ल कोरोना पाजिटिव के पुष्टि होय हे।

कोरोना (Corona) हॉटस्पॉट जोन अहमदाबाद ले ए महिला ह कुछु दिन पहिले ही अपन घर लहुटे रहिस। स्वास्थ्य विभाग ह कोरोना महामारी ल देखत हुये ओला होम क्वारेंटाइन करे रहिस। ओखर सैम्पल ल जांच बर रायपुर भेजे गे रहिस। जिहां ले रविवार रात के जांच रिपोर्ट ह आये हे, जेमा महिला ल कोरोना पाजिटिव होय के पुष्टि होइस हे।

ऊहचे अब तक सरगुजा ह ग्रीन जोन म सामिल रहिस, लेकिन इहां घलो सूरजपुर अऊ कोरिया जिला जइसन पहिला कोरोना पाजिटिव केस मिले हे। बहरहाल कोरोना (Corona) मरीज मिले के बाद प्रशासन ह एक किलोमीटर के दायरा ल सील कर दे हे। स्वास्थ्य विभाग ह मरीज के परिजन मन के सैम्पल लेही। एती संपर्क म आये लोगन मन के घलो जांच स्वास्थ्य विभाग ह करही।