पहिली बार, सीजीपीएससी परीक्षा म पति-पत्नी टॉप म, चार नौकरी छोड़ के पढ़त रिहिस अनुभव, अउ पत्नी विभा हा नौकरी करत-करत

रायपुर। छत्तीसगढ़ म पहिली बार अइसे होए हे कि कोनो भर्ती परीक्षा म पति-पत्नी दूनो झन हा मेरिट लिस्ट म पहला अउ दूसरा स्थान हासिल करे हें। छत्तीसगढ़ लोक सेवा आयोग के तरफ ले 36 पद बर आयोजित मुख्य नगर पालिका अधिकारी वर्ग ख अउ ग भर्ती परीक्षा म रायपुर के अनुभव सिंह अउ विभा सिंह टॉप म आए हें।

जानकारी मिले हे कि लिखित परीक्षा म अनुभव ला 300 म 278 अउ विभा ला 268 नंबर मिले हे। उहें, इंटरव्यू म ओमन ला क्रमश: 30 म 20 अउ 15 नंबर मिले हे। कंप्यूटर साइंस ले बीई करने वाला अनुभव (35) हा 2008 ले अब तक लगभग 20 परीक्षा दे चुके हें।

अनुभव हा चार सरकारी नौकरी म सलेक्ट होईन, लेकिन छोड़ दीन। विभा हा वर्तमान म जनपद पंचायत बिल्हा म एडीईओ हें। ओमन भी 2008 ले पीएससी के तैयारी करत हें। कइसे पाईन दूनों झन ये सफलता, जाने बर आगू पढ़व…

अनुभव सिंह हा बताईन- 2008 ले पीएससी के प्रारंभिक परीक्षा पास करके मेन एग्जाम देवत रेहेंव, लेकिन इंटरव्यू तक नई पहुंच सकेंव। विभा हा जॉब करत-करत सीएमओ के तैयारी करिस अउ दूसरा स्थान हासिल करिस। विभा हा घलो अब तक 10 ले ज्यादा एग्जाम दे चुके हें।

मैं जब जॉब म रहेंव त पढ़ाई म फोकस नई कर पावत रेहेंव, एकर कारण जॉब छोड़ देंव। कई लोगन मन किहिन- बीवी काम करत हे अउ ये घर म बइठ के पढ़त हे। मैं सबला इग्नोर करके पढ़ाई म फोकस करत रेहेंव। वाइफ अउ परिवार वाला मन हर कदम म हौसला बढ़ावत रिहिन।

पहिली हमन दूनों झन कोचिंग ले पढ़ाई करत रेहेंन। एक साल ले हमन स्ट्रेटजी बदलेन अउ हिंदी ग्रंथ अकादमी के किताब मन ले पढ़ाई शुरू करेन। इंकर ले नोट्स भी खुद तैयार करेन। ऑनलाइन वीडियो देखेन। पिछले साल मन के पेपर के पैटर्न समझेन। विभा रोज ऑफिस जाथे, मैं नोट्स बनावंव। फेर हमन मिलके पढ़न। मैं सुबह 7 बजे उठंव, वो हा 5 बजे उठ जाय।