मुठभेड़ म पांच नक्सली ढेर, जवान मन माओवाद ट्रेनिंग कैंप उजारिन, हथियार बरामद
नारायणपुर। छत्तीसगढ़ के नारायणपुर म सनिवार के नक्सली मन से मुठभेड़ म सुरक्षाबल ला बड़े कामयाबी मिलिस। मुठभेड़ म पांच नक्सली मारे गिन अउ उंकर ट्रेनिंग कैंप ला घलो जवान मन उजार दीन। हालांकि ये मुठभेड़ म डीआरजी के दू जवान मन घलो घायल हो हें।
जानकारी के मुताबिक, अबूझमाड़ के ओरछा इलाका म नक्सली मन के मूवमेंट के जानकारी मिले रिहिस। यहू पता चले रिहिस कि नक्सली मन उहां ट्रेनिंग कैंप चलावत हें। एकर बाद जवान सुकवार रात सर्चिंग म निकले रिहिन। होत बिहनिया जवान मन भीतर दाखिल होईन अउ नक्सली मन ऊपर हमला बोल दीन।
मुठभेड़ के दौरान पांच नक्सली मारे गिन। करीब अढ़ई घंटा चले मुठभेड़ म डीआरजी के दू जवान भी घायल हो हें। ओरछा से करीब 20 किमी अंदर धुरबेड़ा म नक्सली कैंप चलत रिहिस, ओला भी डीआरजी जवान मन घेर लिन। फायरिंग के बाद मारे गे नक्सली मन के लास बरामद करे गे हे।
जवान मन पूरा कैंप ला उजार दिन अउ मौका ले बड़ संख्या म हथियार बरामद हो हे। डीजी डीएम अवस्थी के कहना हे कि बड़े नक्सली कैंप रिहिस। जे इलाका म कैंप रिहिस ओला नक्सली मन बहुत सुरक्षित मानथें। माओवाद के गढ़ तक जवान मन पहुंचत हें। जवान मन के उहां पहुंचे ले माओवादी मन ला करारा नुकसान भी उठाए बर परत हे। ये माढ़ एरिया कमेटी के ट्रेनिंग कैंप रिहिस।
