स्वामी आत्मानंद के शिक्षक मन मुख्यमंत्री के करिन आभार प्रकट, सरगुजा म अब 16 आत्मानंद स्कूल
मुख्यमंत्री भूपेश बघेल ह छत्तीसगढ़ म शिक्षा के क्षेत्र म सुघ्घर उदिम करत स्वामी आत्मानंद उत्कृष्ट अंग्रेजी माध्यम स्कूल योजना ल सुरू करिन। ए योजना के सफलता देख के जिहां पढ़ईया लईका मन खुस हे उहें कम पईसा म बेहतर शिक्षा पाके पालक मन घलो गदगद हे। ए योजना कोती ले सरगुजा जिला म 11 स्वामी आत्मानंद स्कूल संचालित होत रिहिस। अब एखर संख्या बढ़ के 16 हो गे हे।
बता देन कि भेंट मुलाकात कार्यक्रम के बेरा म स्थानीय लोगन मन के मांग म मुख्यमंत्री ह 5 नवा स्वामी आत्मानंद स्कूल खोले के घोसना करे रिहिन। घोसना अब पूरा हो गे हे अऊ अब जिला म 11 स्कूल संग 5 नवा स्कूल ह संघरके 16 स्कूल हो गे जेन ह जिला म संचालित होही। ए स्कूलों म शिक्षक मन के कमी ल पूरा करे बर नवा सत्र म 39 शिक्षक मन के भर्ती घलो करे गे हे। आज मुख्यमंत्री भूपेश बघेल ह ए 39 नव नियुक्त शिक्षक मन ल अपन हाथ ले नियुक्ति पत्र प्रदान करिन।
ए बेरा म स्वामी आत्मानंद स्कूल म अध्यापन के बुता करईया शिक्षक मन मुख्यमंत्री भूपेश बघेल को धन्यवाद ज्ञापित करिन हे। ओमन कहिन कि मुख्यमंत्री के ड्रीम प्रोजेक्ट म हमन अध्यापन कार्य बर नियुक्त होए हन जेन ल हमन जी जान लगाके पूरा करबो।
