अजय चंद्राकर के आरोप ‘राष्ट्रीय गर्व के मजाक उड़ात हे राहुल गांधी’

रायपुर. छत्तीसगढ़ सरकार के पूर्व मंत्री अउ भाजपा के टिकट ले कुरूद विधायक अजय चन्द्राकर ह कांग्रेस के राष्ट्रीय अध्यक्ष राहुल गांधी उपर निशाना साधिस हे. संगेचे प.बंगाल की मुख्यमंत्री ममता बैनर्जी उपर घलो अजय चन्द्राकर ह आरोप लगाइस हे. पूर्व मंत्री चन्द्राकर ह कहिन के, राहुल गांधी, कांग्रेस अउ ममता बैनर्जी राष्ट्रीय गर्व के मजाक उड़ात हे. आज देस बर गर्व के बात हे. फेर घलो विपक्ष के ये लोग अपन बयानबाजी ले बाज नई आवत हे.

अजय चन्द्राकर ह कहिन के, राष्ट्रवाद के मुद्दा म घलो राहुल गांधी अउ कांग्रेस के लोग पीएम के मजाक उड़ात हे. राहुल गांधी के ओर ले करेगे गरीबी उन्मूलन के बात सिरिफ मानसिकता परिवर्तन के आंदोलन हे. कांग्रेस बर दिल्ली के सत्ता के मतलब मां, बेटा, बेटी अउ जम्हाई हे. उमन ल देस के मतलब नई हे.

राजधानी रायपुर म बुधवार के मीडिया ले चर्चा म अजय चन्द्राकर कहिन के, प्रदेस म आयुष्मान भारत योजना ल बंद करे के षड्यंत्र करे जात हे. छत्तीसगढ़ प्रवास के दउरान राहुल गांधी जे कार्यक्रम म सामिल होइन, आचार संहिता के बावजूद ओ मा राजनीति होइस. कांग्रेस अपन अस्तित्व ल बचाए के प्रयास करत हे. अजय चन्द्राकर ह कहिन के, सीएम बतावय के, कांग्रेस सराबबंदी कब करही, का कांग्रेस चुनाव म सराब के इस्तेमाल नई करही? का जियादा मूल्य म सराब नई बेचे जाही? सिरिफ पइसा बर सराब जियादा मूल्य म बेचे जात हे.