टीआई समेत चार पुलिसकर्मी मन ल उम्रकइद के सजा

रायपुर। दलित युवक के पुलिस हिरासत म मउत के मामला म एट्रोसिटी कोर्ट ह आरोपी टीआई समेत चार पुलिसकर्मी मन ल उम्रकइद के सजा सुनाइस हे. मामला सितंबर 2016 म जांजगीर चांपा जिला के मुलमुला थाना म दर्ज होय हिस हे.

जिला के नरियरा गांव के रहवइया एक दलित युवक सतीश नोरगे ल बिजली विभाग के कर्मचारी के संग विवाद करे  के आरोप म मुलमुला थाना के  पुलिस ह हिरासत म लेय रहिस हे. बाद म सतीश नोरगे के पुलिस हिरासत म मउत हो गिस.

घटना के बाद तहसीलदार के आघू मृतक के परिजन मन ह  पुलिस उपर पिटाई के आरोप लगाय रहिन हे.  तत्कालीन कलेक्टर भारती दासन अउ तत्कालीन एसपी अजय यादव ह घलो ए मामला ल गंभीरता ले लिस हे. जांच के बाद इलाका के टीआई जितेन्द्र राजपूत समेत चार पुलिसकर्मी मन ल निलंबित कर उंखर  खेलाफ अपराध कायम करे गिस.

25 सितंबर 2016 के टीआर्इ राजपूत समेत चारों आरोपी मन ह सरेंडर करिन.  22 दिसंबर 2016 के जांजगीर जिला के विशेष अदालत (एट्रोसिटी) ह ए मामला के सुनवाई सुरू रिस अउ 26 फरवरी 2019 के न्यायाधीश नीता यादव ह चारों आरोपी मन ल उम्रकइद के सजा सुनाइस हे.