जय जोहार…. (Chhollywood) छत्तीसगढ़ी एल्बम के दौर ह फेर ले लहुट आय हे। बड़का बजट के घलो एल्बम ह बने ल सुरू हो गे हे। इहीं कड़ी म पहिली बार सुवा गीत म एक संग चार बहिनी ह नजर आही। नाचव अऊ गावव रे सुवा के नाम ले काली बिहनिया 7 बजे क्रिएटिव विजन के यूट्यूब चेनल म रिलीज होही।
चारो बहिनी ह पहिले ले ही प्रसिद्ध गायिका हे, लेकिन पहिली बार सुवा गीत ले एक संग सुने अऊ देखे ल मिलही। चारो बहिनी ह दूरदर्शन के ए ग्रैड के अधिकारी के पुत्री हे। ए गीत के रचना स्वयं विजया राउत सहारे, रजत दत्त अऊ मीनाक्षी राउत ह करे हे।
ए गीत म संगीत प्रसिद्ध संगीतकार सूरज महानंद ह दे हे अऊ कोरियोग्राफी सतीश साहू, छायांकन गौरव साहू, संपादन बंटी अऊ कार्तिक के हे। (Chhollywood) उहचे गीत के निर्माता-निर्देशक दिग्विजय वर्मा अऊ सह निर्माता प्रभाकर राउत, मिली सहरे, प्रदीप रूले हे।
बता देन कि सबो बहिनी ह छत्तीसगढ़ म जन्म ले हे। इही मिट्टी म अपन संगीत के शिक्षा पूरा करिन। संगीत म एमए, शास्त्रीय गायन, लोक संगीत अऊ सुगम संगीत के शिक्षा ले हे। सबो बहिनी ह छत्तीसगढ़ी फिलिम एल्बम म अपने आवाज ले अपन एक अलग पहचान बनाय हे।
गीत अऊ संगीत के क्षेत्र म राजकीय अऊ राष्ट्रीय पुस्कार ले सम्मानित करे गे हे। (Chhollywood) चारो बहिनी ह आकाशवाणी अऊ दूरदर्शन के ग्रेडेड कलाकार हे। विजय राउत सहारे ह छत्तीसगढ़ के दर्जनो फिलिम अऊ सैकड़ो एल्बम म अपन आवाज दे हे। हिन्दी फिलिम म घलो अपन आवाज दे हे।
