दूसर के अधार कार्ड म अपन फोटू लगा के लिस बैंक ले लोन, नई पटिस किस्त तब होईस जालसाजी के भंडाफोड़

धमतरी। दूसर के अधार कार्ड म एक युवक ह अपन फोटू ल लगा के बैंक ले लोन ले लिस। एखर भंडाफोड़ तब होईस जब बैंक वाले मन ह लोन के किश्त नई पटे म आधार कार्ड के पता म जब संपर्क करिस। पुलिस ह वो जालसाज युवक ल पकड़िन हे।

अइसन जानकारी मिले हवय कि आरोपी युवक राजेंद्र सिंह पिता प्रकाश सिंह 33 साल ह भोपाल म रहवईया वैभव मोदी के अधार कार्ड म जालसाजी कर अपन फोटू लगा ले रहिस। ओखर बाद अधार कार्ड ल पहिचान बनाके वैभव के नाम से बैंक ले लोन ले लिस। लोन के एको किस्त जब नई पटिस त बैंक वाला मन वैभव ले संपर्क करिन हे, तब वो ह कोनो लोन नई ले हंव कहिके बताईस। तेखर बाद जांच म पता चलिस कि राजेन्द्र सिंह ह उंख्रर नाम म लोन ले हे अउ धमतरी के दू ठन बैंक म खाता घलो खुलवाय हे। एक खाता वैभव मोदी के नाम म अउ दूसर खाता ह राजेन्द्र सिंह के नाम म खोल के अपन काम चलावत रिहिस। सिटी कोतवाली पुलिस ह धोखाधड़ी अउ कूटरचना के अपराध दर्ज आरोपी राजेन्द्र ल गिरफ्तार कर न्यायिक रिमांड म भेजीन हे।