chhattisgarh : मुख्यमंत्री शहरी स्लम स्वास्थ्य योजना ले अब तक 27 लाख ले जादा मनखे मन के मुफत इलाज, पढ़व

जय जोहार। (chhattisgarh ) मुख्यमंत्री शहरी स्लम स्वास्थ्य योजना के माध्यम ले अब तक 27 लाख ले जादा मनखे मन के इलाज मोबाइल मेडिकल यूनिट के चिकित्सा दल डहार ले स्लम बस्ती म पहुंचके करे गेहे। योजना के तहत अब पूरा राज्य के नगरीय क्षेत्र के स्लम बस्ती म चिकित्सक, पैरामेडिकल टीम, मेडिकल उपकरण अउ दवा ले लैस 120 मोबाइल मेडिकल यूनिट पहुंचके मनखे मन ल स्वास्थ्य सुविधा उपलब्ध करात हे ।

ए योजना के माध्यम ले अब तक पांच लाख 78 हजार 239 मरीज मन के पैथालॉजी टेस्ट के सुविधा मुहैया कराय के संग ही 23 लाख 8 हजार 637 ले जादा मरीज मन के मुफत दवा दे गेहे। योजना के तहत लाभान्वित मरीज मन म दो लाख 46 हजार 481 श्रमिक घलो हे ।

छत्तीसगढ़ के नगरीय प्रशासन अउ विकास विभाग डहार ले संचालित मुख्यमंत्री शहरी स्लम स्वास्थ्य योजना के तहत अब तक राज्य के 169 नगरीय निकाय के स्लम बस्ती म 38 हजार 990 कैम्प लगाके मनखे मन के मुफत जांच अउ उपचार कर दवाई दे गेहे । नगरीय प्रशासन अउ विकास मंत्री डॉ. शिवकुमार डहरिया ह विभागीय अधिकारी मन ल नगरीय क्षेत्र के तंग बस्ती अउ जरूरत मंद मनखे मन के स्वास्थ्य परीक्षण कर ओमान ल मुफत दवा उपलब्ध कराये जाये के निर्देश देहे ।