नौकरी लगवाए के नाम म 8 लाख रूपिया के धोखाधड़ी, थाना म करिन शिकायत

रायपुर. नउकरी लगवाय के नाम म रायगढ़ के एक झन युवक ले 8 लाख रूपिया के धोखाधड़ी करे के मामला आघू आए हे, जेखर शिकायत राखी थाना म करे गे हे।

अइसन जानकारी मिले हाबय कि रेवन्यू इंस्पेक्टर के पद म नउकरी लगवाहूं कहिके झांसा देके रायगढ़ के रहवइया संदीप कुमार श्रृंगी ले 8 लाख रूपिया के ठगी करे हे। प्राथी ह बतइस हे कि वो ह साल 2012 म दुर्ग के जिला अस्पताल म संविदा म पीआरओ रहीस, जेखर बाद साल 2015 म उंखर मुलाकात मंत्रालय के स्वास्थ्य विभाग म रायगढ़ के रहवइया हरिशंकर वैद्य ले होईस। इही दउरान संदीप ल रेवेन्यू इंस्पेक्टर अउ हॉस्टल अधीक्षक के पद निकले हे करके बतइस अउ ओला नउकरी लगवाय के बात कहिस। ताहन संदीप ह आरोपी के बात म आके कई किस्त म ओला 8 लाख रूपिया दे दिस। फेर संदीप के नउकरी नई लगीस त आरोपी ले अपन पइसा ल वापस मांगिन त जेन ह पईसा ले रहिस तेन ह टालमटोल करे ल लग गे। आखिर म संदीप ह ये मामला के शिकायत राखी थाना म करिन हे, जेखर बाद पुलिस ह आरोपी के खिलाफ धोखाधड़ी के अपराध दर्ज कर जांच म लिन हे।