दंतेवाड़ा. एती ओती छिपे नक्सली मन के अब पहचान आसान हो जाही काबर कि जिला के पुलिस ह इहां सक्रिय माओवादी अऊ जनमिलिशिया दलम के सदस्य मन के कुंडली ल तियार करत हे। इही नहीं पुलिस के योजना हाबे के ए कुंडली ल सार्वजनिक करके पुलिस थाना अऊ पंचायत भवन म चिपकाए जाए। ऐखर पीछू पुलिस के मंशा हे कि ए नक्सली मन के नाम, पता अऊ इनाम ल आम मनखे मन घलो जाने अऊ पुलिस के मदद करय।
जिला के हार्डकोर नक्सली अऊ जनमिलिशिया सदस्य मन के जम्मो जानकारी अब आम मनखे मन के हाथ म होही। जिला म सक्रिय नक्सली मन के पुलिस ह सूची ल तैयार करत हे जेमा नाम, गांव अऊ ओखर उपर घोषित इनाम के संगे-संग ओ ह कोन-कोन वारदात म शामिल रिहिन एखर जम्मो जानकारी ऐमा होही। पुलिस ह ऐला जल्दी सार्वजनिक करे के तियारी म लगे हे। पुलिस थाना अऊ पंचायत भवन म चिपकाए के साथ गांव के सरपंच मन ल घलो ऐखर जानकारी दे जाही। ऐ सूची म लगभग 120 गांव के नक्सली अऊ ओखर समर्थक मन ल चिन्हित करे गे हे।
दंतेवाड़ा पुलिस अब जंगल अऊ गांव म रहवईया नक्सली अऊ ओखर सहयोगी मन के खेलाफ बड़े कारवाई करे के तियारी म जुट गे हे। कहे जात हे कि चिन्हित नक्सली मन के खेलाफ बड़े कारवाई होही। ऐती पुलिस ह ऐ कारवाई म रियायत दे के घलो बात करे हे। काबर कि यदि कोनों नक्सली या ओखर परिजन ओला सामान्य जिनगी जीए बर पुलिस ले संपर्क करही अऊ समर्पण करही त ओखर सहयोग करे जाही।
पुलिस अधिकारी मन के कहिना हे कि सूची प्रकाशन अऊ कार्रवाई के पहिली नक्सली मन ले मुख्यधारा म लौटे के मौका दे जाही। संबंधित सरपंच अऊ परिजन या फेर खुदे नक्सली ह पुलिस ले संपर्क कर सकत हे नई अऊ सरेंडर कर सकत हे। आम जिनगी जीए बर ओमन ल मऊका अऊ सरकार के नियम के तहत सुविधा दे जाही। उहें जेखर नाम सूची म गलत छप गे हे त सरपंच अऊ परिजन मन आके ओला सुधार करवा सकत हे।
एखर अलावा पुलिस ह नक्सल इलाका म पढ़ईया लईका मन के काउंसलिंग घलो करे के योजना तियार करत हे। काबर कि कुछ नक्सली मन के लईका मन स्कूल-आश्रम शाला म पढ़ई-लिखई करत हे। माता-पिता अऊ परिजन मन के गतिविधि ले ओखर मन उपर आंशिक असर होवत हे। अऊ ओमन दूसर लईका मन ल गलत काम करे बर उकसा सकत हे। अईसे म लईका मन के काउंसिलिंग करे के बात घलो होवत हे। आश्रम शाला म नक्सली मन के लईका के जानकारी पुलिस ह जुटावत हे। ए लईका मन दंतेवाड़ा जिला के अलावा बीजापुर, सुकमा अऊ बस्तर जिला के संस्था म पढ़ई-लिखई करे बर गे हे।
