रायपुर। गरियाबंद के वनांचल क्षेत्र म रहइया विशेष पिछड़ी जनजाति के लइका मन ल विकास के मुख्य धारा ले जोड़े बर मुख्यमंत्री विष्णु देव साय ह आज गरियाबंद प्रवास के बेर केन्द्र सरकार के विशेष योजना ‘पीएम जनमन’ के तहत 4 नवा छात्रावास भवन के शिलान्यास करिन। ए छात्रावास धवलपुर, जिडार, जुगाड़ अउ पीपरछेड़ी म बनाए जाहि। ए छात्रावास ल पूर्ण करे बर 10 करोड़ रूपया के राशि स्वीकृत करे गिस।
बता दन कि वनांचल गरियाबंद जिला म कमार विशेष पिछड़ा जनजाति निवास करथे। ए वर्ग के लइका मन ल शिक्षा ले जोड़े बर पीएम जनमन योजना के तहत ए छात्रावास के निर्माण करे जात हे। एखर ले ए वर्ग के लइका मन के पढ़ाई म निरंतरता आहि। संग म वो अपन बेहतर कैरियर के घलो निर्माण कर सकहि। पीएम जनमन योजना के तहत बनाए जाए वाला ए छात्रावास सर्वसुविधायुक्त होही। ए छात्रावास म पुस्तकालय अउ कंप्यूटर कक्ष के घलो निर्माण कराए जाहि।
