बिहाव करे के जिद करना प्रेमी ल पड़िस महंगा, प्रेमिका अउ उंखर मां ह मिल के उतारिस मउत के घाट
बिलासपुर. उसलापुर के गोखले नाला के पास एक ठन खंडहर पड़े मकान म एक युवक के सड़े-गले लाश मिलिस हे, जेखर ले इलाका म सनसनी फैल गे हे। घटना के जानकारी मिले ले सिविल लाइन पुलिस ह मौका म पहुंचिन, जिहां जांच म पता चले हवय कि मृतक कुम्हारपारा के रहवइया दिनेश श्रीवास हरे। जेन ह 27 जून ल लापता रहीस। युवक के घरवाले मन ह 29 जून के सिविल लाइन थाना म ओखर गुमशुदगी के रिपोर्ट दर्ज कराए रहीस।
एसडीओपी कोटा ह बतइन कि मृतक अउ तिफरा मन्नाडोल म रहईया युवती ले प्रेम संबंध रिहिस हे। मृतक युवक ह युवती संग बिहाव करे बर चाहत रिहिस, फेर इही बात ले लड़की के मां ह नाराज रिहिन। जेखर बाद मां अउ बेटी ह युवक ल रस्ता ले हटाए के प्लान बनाईस अउ ओला मउट के घाट उतार दिस। पुलिस ह आरोपी युवती अउ ओखर मां ल गिरफ्तार करिन हे।
गौरतलब हाबय कि बेटा के गायब होय के बाद लगातार उंखर मां ह थाना पहुंच के शिकायत दर्ज करा के अपन बेटा ल खोजे के फरियाद करत रिहिन। सिविल लाइन पुलिस ह येला गंभीरता ले नई लीन अउ आखिरकार एक दिन वो मां ल अपन जवान बेटा के लाश सड़े-गले हालत म देखे ल पड़िस।
