राखी बनाबो तभे तो पढ़ पाबो , आत्म निर्भरता के मिसाल बनीस बालिका गृह के नोनी मन

जय जोहार रायपुर… जब ले लॉक डाउन लागे हे तब ले स्कूल बंद हे अऊ पढ़ाई लिखाई घलो बंद हे  , सरकार ह ऑनलाइन पढ़ाई कराय के घोषणा तो कर दे हे लेकिन ओखर बर हजारो रुपिया के मोबाइल खरीदे ल पढ़ही ,

अइसे म शासकीय बालिका गृह के नोनी मन करा समस्या खड़े होगे , उन्हा चालीस नोनी मन रही के पढ़ाई लिखाई करथे अऊ ऑनलाइन पढ़ाई बर ऊंखर पास मोबाईल नई हे जेखर बर नोनी मन रात दिन मेहनत कर के राखी बनावत हे जेला बाजार म बेच के अपन ऑनलाइन पढ़ाई के समस्या ल दूर करही ,

बालिका गृह के अधीक्षिका रत्ना दुबे ह किहिस कि साल भर ये नोनी मन कुछ न कुछ बनात रहिथे ये बार राखी ल जादा मात्रा म बनाय जाहि काबर कि ओमन ल ऑनलाइन पढ़ाई बर मोबाईल के जरुरत हे , एती नोनी मन के कहना हे कि अइसे करे म हमर समस्या घलो दूर होही अऊ हमन आत्मनिर्भर घलो बन पाबो.