सुशासन तिहार: उलखर अउ बड़े नावापारा में उमड़िस मनखे मन के भीड़

मोका में ही दूर होइस गाँव वाले के समस्या

रायपुर. छत्तीसगढ़ सरकार के बड़े पहल ‘सुशासन तिहार 2026’ के जरिया प्रसासन अउ जनता के बीच के दुरिहा ह कम होवत दिखत हे। एही कड़ी में सारंगढ़ ब्लॉक के गाँव उलखर अउ बरमकेला विकासखंड के गाँव बड़े नावापारा में सिबिर लगाए गिस, जहाँ 1400 ले जादा गाँव वाले सामिल होइन। ए सिबिर मन के मुख्य लक्ष्य सरकारी योजना ला सीधा आम जनता तक पहुँचाना अउ ओखर समस्या के तुरते निपटारा करना रहिस। उलखर सिबिर में जहाँ 638 आवेदन आईन, उही डाहर बड़े नावापारा में 836 गाँव वाले ह अपन माँग अउ सिकायत बर पंजीयन कराइन।

कलेक्टर ह दोनों ही सिबिर के बारीकी ले जाँच करिन अउ अधिकारी ला निर्देश दीन कि मिले हुए आवेदन के निपटारा ला प्राथमिकता ले करे जाय। ओमन अलग-अलग विभाग के स्टॉल ला देखिन अउ ए जाने के कोसिस करिन कि गाँव वाले ला सबले जादा कउन से काम में तकलीफ होवत हे। सिबिर के बखत स्वास्थ्य अउ आयुर्वेद विभाग कोती ले मुफ्त जाँच करे गिस, उही डाहर मछरी पालन विभाग कोती ले जाल बाँटे गिस अउ समाज कल्याण विभाग ह दिव्यांग परमान पत्र अउ पेंशन जइसन सुबिधा ला तुरते पूरा करिस। राजस्व विभाग ह किसान किताब अउ बी-1 बाँटे में फुर्ती देखािस, त खाद्य विभाग ह पात्र मनखे मन ला नवा राशन कार्ड सौंपिन। प्रधानमंत्री आवास योजना के तहत मंजूरी अउ घर पूरा होय के परमान पत्र मिले ले कतको परिवार के अपन घर के सपना ह सच होइस।

प्रसासनिक काम के संग ए सिबिर ह सामाजिक सरोकार के घलो गवाह बनिस। महिला एवं बाल विकास विभाग कोती ले गरभवती महिला मन के गोदभराई करके ओमन ला उपहार दिय गिस अउ छोटे लइका मन के अन्नप्राशन संस्कार कराए गिस। हमर इहाँ के संस्कृति ला बढ़ावा देय बर छत्तीसगढ़ी कलेवा के स्टॉल लगाए गे रहिस, जे ह गाँव वाले के मन ला मोह लीस। पर्यावरण ला बचाए बर सजगता देखावत कारयक्रम में आए सबो मनखे मन ह पानी बचाए के सामूहिक कसम (सपथ) खाइन। ए सफल आयोजन में इलाका के जनप्रतिनिधि अउ विभाग के कर्मचारी ह एक साथ मिलके काम करिन, जेखर ले सरकार के भलाई योजना के लाभ आखिरी मनखे तक असानी ले पहुँच सकिस।