सुशासन तिहार: औरदा मं साकार होइस सपना के आशियाना, हितग्राही मन ला मिलिस पक्का मकान के चाबी

पीएम आवास योजना के हितग्राही मन ह भावुक होके मुख्यमंत्री के मानिन आभार, कच्चा घर के परेशानी ले मिलिस मुगति

रायपुर,. मुख्यमंत्री विष्णुदेव साय के पहल मं प्रदेश भर मं आयोजित ‘सुशासन तिहार 2026’ के तहत आज विकासखंड पुसौर के ग्राम औरदा मं खुसी के नवा किरन दिखाई दीस। जनसमस्या निवारण शिविर के बखत प्रधानमंत्री आवास योजना (ग्रामीण) के पात्र हितग्राही मन ला ओमन के नवा पक्का घर के चाबी सउंपे गिस अउ पूरा रीति-रिवाज के संग गृह प्रवेश कराए गिस।

कच्चा मकान के पीरा ले मिलिस आजादी

शिविर मं ग्राम पंचायत सुकूलभठली के संतराम, माला प्रधान अउ रामकुमार चौहान, ग्राम पंचायत जकेला के चंद्रमा गुप्ता अउ औरदा के जयंती साव संग अहिल्या पाव ला पक्का मकान के सौगात मिलिस। बछर मन ले टूटे-फूटे कच्चा मकान मं संघर्ष करइया ए परिवार के चेहरा मं पक्का घर मिले के संतोष साफ दिखत रहिस।

हितग्राही रामकुमार चौहान ह भावुक होके बताइस कि “अब मोर परिवार सुरक्षित हे। बरखा के दिन मं हमर कच्चा मकान के छानी ले पानी टपकय, जेखर सेती पूरा परिवार रात भर जाग के बितावय। पक्का मकान मिलना हमर बर कोनो सपना के सच होय जइसन आय। अब हमन सुरक्षित अउ सम्मान के संग रहत हवन।” एक आन हितग्राही ह कहिस कि प्रधानमंत्री आवास योजना ह सिरिफ ईंटा-पथरा के मकान नइ आय, बल्कि ओकर लइका मन के बढ़िया शिक्षा अउ सामाजिक सुरक्षा के अधार आय।

सुशासन तिहार के उद्देश्य

बता दन कि ‘सुशासन तिहार 2026’ के आयोजन मुख्यमंत्री विष्णुदेव साय के ओ मंशा के मुताबिक करे जावत हे, जेमं सरकार के योजना के लाभ सीधा अउ तुरंते आखिरी मनखे तक पहुँचाना हे। औरदा शिविर मं न केवल आवास के चाबी बांटे गिस, बल्कि अलग-अलग विभाग मन ले जुड़े समस्या के मौका मं ही निराकरण करके गांव वाले ला जनकल्याणकारी योजना ले जोड़े गिस। औरदा अउ आस-पास के पंचायत के हितग्राही मन ले 6 परिवार ला गृह प्रवेश बर चाबी मिलिस। शिविर के माध्यम ले योजना के लाभ सीधा पात्र मनखे मन तक पहुँचाए गिस। पक्का आवास मिले ले ग्रामीण जीवन स्तर मं सुधार अउ आत्मविश्वास मं बढ़ोत्तरी होइस हे।