छत्तीसगढ़ सरकार ह कोरोना महामारी के रोकथाम बर हरसंभव कदम उठाए हे: शैलेश नितिन त्रिवेदी

जय जोहार रायपुर…. प्रदेश कांग्रेस के महामंत्री अऊ संचार विभाग के अध्यक्ष शैलेश नितिन त्रिवेदी ह कहिन कि दलगत राजनीति ले ऊपर उठ के सबो कोरोना के खिलाफ जंग म संग आएं। कोरोना महामारी जनजीवन ले जुड़े विषय हे, एखर ले लड़े म सब ल संग होना चाही। कोरोना राजनीति के विषय नई हे अऊ जन स्वास्थ्य ले जुड़े बेहद गंभीर मामला हे।

छत्तीसगढ़ सरकार ह कोरोना महामारी के रोकथाम बर हरसंभव कदम उठाए हे। भाजपा ए देखे कि भाजपा शासित राज्य मन म कोरोना के महामारी ल फैले ले रोके बर क्या-क्या कदम उठाए गे हे। अगर कोनो भाजपा शासित राज्य म कोनो अतिरिक्त कदम उठाए गे हे, जेन छत्तीसगढ़ म नई उठाए गे हे, त ओखर जानकारी भाजपा ल जनहित म सरकार अऊ मीडिया ल देना चाही। कांग्रेस अपन सरकार ले वो सबो कदम घलो उठाए के अनुरोध करही।

कोरोना के स्थिति म प्रदेश कांग्रेस के महामंत्री अऊ संचार विभाग के अध्यक्ष शैलेश नितिन त्रिवेदी ह कहिन कि पूरा देश अऊ पूरा विश्व कोरोना के विभीषिका के सामना करत हे। अमेरिका जैसा शक्तिशाली देश ह कोरोना ल राष्ट्रीय आपदा घोषित करे हे। एला देखत हुए कोरोना ल विश्व स्वास्थ्य संगठन ह वैश्विक महामारी घोषित कर दे हे। अमेरिका म आपातकाल घोषित करे गे हे। जापान, ईरान, इटली अऊ दक्षिण कोरिया म सैकड़ों मौत होए हे।