सरकार ह उठाही रेबीज ले पीड़ित मासूम हेमंत के ईलाज के खरचा

रायपुर. घोर नक्सल इलाका नारायणपुर जिला म रेबीज ले पीड़ित एक झन मासूम लइका के इलाज के पूरा खरचा ल अब राज्य सरकार ह उठाही। एखर बर मुख्यमंत्री भूपेश बघेल ह नारायणपुर जिला के कलेक्टर अउ स्वास्थ्य सचिव ल निरदेश दे हे। बता देन कि ये लइका ल इलाज बर राजधानी के अंबेडकर अस्पताल लाए गे रिहिस, जिहां डॉक्टर मन ह इलाज करे बर मना कर दिस अउ बिना इलाज के वापिस भेज दिस। मुख्यमंत्री ह ये मामला ल गंभीरता से लिन हे अउ ओखर इलाज के बेवस्था बर कलेक्टर अउ स्वास्थ्य सचिव ल निरदेश दिस हे। वो लइका ल काकावाड़ा ले रायपुर लाए बर टीम रवाना होगे हे। लइका के इलाज एम्स म कराए जाही।

बता देन कि नारायपुर जिला के ओरछा विकासखण्ड के गांव काकावाड़ा के रहइया अउ रामकृष्ण मिशन आश्रम म 7 वीं कक्षा म अध्ययनरत 14 साल के हेमंत आरवी ल एक कुत्ता ह चाब दिस, जेखर इलाज बर आश्रम प्रबंधन ह राजधानी के अंबेडकर अस्पताल लाए रिहिस हे। केजुएलिटी डॉ. रोहित दुबे ले अनुरोध के बाद लइका ल रात 8 बजे पीडीयाट्रिक वार्ड म रेफर करे गिस, जिहां शिशु विभाग के डॉक्टर ह वो लइका ल भरती करे बर मना कर दिन अउ आइसोलेशन म रखे बर घलोक इनकार कर दिस, जबकि वार्ड ह खाली रिहिस हे।