विशेष जरूरत वाले लइका मन बर राज्यपाल के संवेदनसील पहल
एम्स के दांत अस्पताल म मिलत हे इलाज के सुविधा
रायपुर. विशेष जरूरत वाले (दिव्यांग) लइका मन के बने स्वास्थ्य अउ इलाज ल लेके राज्यपाल रमेन डेका कोति ले एक सराहनीय पहल करे गे हे। ओ मन ह एम्स के दांत रोग विभाग ल अपन स्वेच्छानुदान ले 5 लाख रुपिया के रासि दे रहिन, जेखर माध्यम ले ए लइका मन के दांत के बीमारी के इलाज करे जावत हे।
आज राज्यपाल ह एम्स पहुँच के दांत रोग विभाग के जायजा लिन। ए दौरान ओ मन ह इलाज बर आये विशेष जरूरत वाले लइका मन ले मिलिन अउ ओ मन के स्वास्थ्य के हाल-चाल जानिन। लइका मन अउ ओ मन के परिवार वाले ले गोठ-बात करत ओ मन ह इलाज के तरीका अउ मिलत सुविधा के बारे म घलो जानकारी लिन।
राज्यपाल ह डॉक्टर अउ संबंधित अधिकारी मन ले गोठियावत कहिन कि विशेष जरूरत वाले लइका मन ल बढ़िया अउ सुग्घर स्वास्थ्य सेवा ल आसानी ले उपलब्ध कराना हमर पहिली प्राथमिकता होना चाही। एम्स के दांत विभाग म चलत ए पहल ले कतकोन लइका मन ल दांत के बीमारी ले राहत मिलत हे, जेखर ले ओ मन के जिनगी के स्तर म सुधार आवत हे।
