राजनांदगांव। जिले म मानव तस्करी के बड़ा मामला सामने आए हे, जिहा हावड़ा मुंबई मेल ले 34 छोटे-छोटे लइका ल लेके हावड़ा ले मुंबई के नन्दूरबार ले जात रिहिस। पुलिस ह मानव तस्कर करैया दू आरोपी ल राजनांदगांव रेल्वे स्टेशन में धर-दबोचिस। ये घटना के सूचना मिलिस हे ताहने राजनांदगांव रेलवे स्टेशन प्लेटफॉर्म नंबर 2 म हड़कंप मच गे। उहे सबे लइका मन ल रेलवे स्टेशन म पुलिस अउ जीआरपी के मदद ले उतार ले गिस।
अईसे जानकारी मिले हाबय कि पश्चिम बंगाल ले दू झन युवक मन ह 34 झन लइका मन ल मुंबई ले जावत रहिस। ये लइका मन ल पश्चिम बंगाल ले महानगर म काम करे बर ले जात रिहिस। लइका मन 6 ले 13 बछर के है। ये मामला म राजनांदगांव पुलिस ह पड़ताल करे म जुट गे हे।
पुलिस ह कहिन हे कि हावड़ा मुंबई मेल म सब लइका ल ले जावत रहिस। लइका मन ल मुंबई ले जाए के बात सामने आए हे। उंहे ये मामला म संलिप्त युवक ह खुद ल मदरसा के टीचर बतईस अउ लइका मन ल मदरसा म पढ़ई करे बर मुंबई ले जाए के बात कहिस हे। लइका मन ह बिहार क्षेत्र के रहैया हरे अइसे बताय जाता हे। पुलिस ह सब्बो लइका ल सुरक्षित उतारे हे अउ ओखर परिवार वाले मन ले संपर्क करे के परयास करत हे।
