- भेंट-मुलाकात के बेरा म जेन गांव वाला मन के घर पहुना बन करे रिहिन भोजन आज अपन निवास म कराईन भोज
- एक-एक भोजन टेबल पहुंचगे जानिन अवईया पहुना मन के परिवार के हाल-चाल
मुख्यमंत्री भूपेश बघेल ह जम्मो प्रदेश ले भेंट-मुलाकात कर डरिन। छत्तीसगढ़ के जम्मो 90 विधानसभा के हाल-चाल ल जाने बर ओमन अपन कार्यक्रम भेंट मुलाकात ले दउरा करिन। जिहां पहुंच के ओमन लोगन मन ले मिलिन अऊ सरकारी योजना मन के क्रियान्वयन के जमीनी हकीकत ले रू-ब-रू होए रिहिन। ए दउरा के बेरा म जेन गांव वाला मनखे घर मुख्यमंत्री ह पहुना बन के देसी सुवादिस्ट भोजन के आनंद उठाए रिहिन आज उही परिवार वाला मन ल न्योता दे के भोजन कराए बर अपन निवास म बुलाए रिहिन। मुख्यमंत्री के पहुनाई म पहुंचे पहुना मन के पारंपरिक तरीका ले स्वागत करे गिस। संगे-संग सीएम बघेल ह ओखर मन ले घर-परिवार के गोठ-बात घलो करिन।
आज मुख्यमंत्री के पहुनाई म बस्तर संभाग के इही ग्रामीण परिवार मन ल न्योता दे गे रिहिन अऊ ओखर मन के शानदार स्वागत होईन। ए बेरा म संसदीय सचिव रेखचंद जैन, विधायक मोहन मरकाम, विधायक चंदन कश्यप, विधायक राजमन बेंजाम, विधायक विक्रम मंडावी, विधायक अनूप नाग के संगे-संग बस्तर संभाग के कई झन जनप्रतिनिधि अऊ सरपंच मन घलो संघरे रिहिन।
मुख्यमंत्री ह अपन निवास म बस्तर ले आए पहुना मन के स्वागत करत कहिन कि भेंट-मुलाकात कार्यक्रम म जब हमन बस्तर गे रेहेन त कई झन के घर म साथी मन के घर भोजन करे रेहेंव। आप मन जम्मो लोगन मन बड़ स्नेह संग स्वादिष्ट भोजन कराएव। आज आप मन मुख्यमंत्री निवास म आए हो त आप जम्मो के अभिनंदन हे। आज मोला आप मन ल न्योता दे के अवसर मिले हे अऊ आप मन संग अऊ आप मन के परिवार संग लईका मन घलो आए हे अऊ में हे जम्मो झन के स्वागत करत हों।
भोज के बेरा म मुख्यमंत्री ह खुदेच भोजन के एक-एक टेबल म जाके ग्रामीण मन ले आत्मीयता ले मुलाकात करिन अऊ ओखर मन के हाल-चाल जानिन। संगे-संग घर परिवार के गोठ-बात करिन। मुख्यमंत्री निवास मे आए पहुना मन ल स्वादिष्ट व्यंजन के संगे-संग लाई बरी, रमकलिया के कढ़ी, लौकी के खीर अऊ मावा बाटी परोसे गिन।
मुख्यमंत्री ह कहिन कि आप मन भेंट-मुलाकात के बेरा म नवा-नवा साग-भाजी बनाएव अऊ मोला बड़ प्यार देके खिलाएव। पखांजूर म आश्रम म भोजन के व्यवस्था रिहिस। आज इहां भानूप्रतापपुर, सुकमा, कोंडागांव के संग बस्तर संभाग के जम्मो विधानसभा ले हमर साथी मन आ हे। जम्मो के घर में ह नमक खाए हों त सोंचेंव कि मुख्यमंत्री निवास म जम्मो ल बुलाके भोजन कराओं। सरगुजा अऊ रायपुर संभाग के लोगन मन ल में बुलाए रेहेंव अऊ हर संभाग के लोगन मन ल बुलाके विधायक, जनप्रतिनिधि, सरपंच अऊ जेखर घर में भोजन करे रेहेंव ओमन ल आमंत्रित करे हों।
मुख्यमंत्री बघेल ह कहिन कि भेंट मुलाकात कार्यक्रम हमन पाछू के बछर म 4 मई ले सुरू करे रेहेन। एला एक बछर हो गे हे अऊ आज 17 जून हे। बड़ सुघ्घर भेंट-मुलाकात कार्यक्रम होईस अऊ बड़ अकन लोगन मन ले गोठ-बात होईस। योजना मन के मैदानी स्थिति ल जाने के मौका मिलिस। विकास कार्य के मांग होईस, ओखर बर घलो में घोषणा करेंव। ओखर बाद फेर समाज के लोगन मन ले भेंट होईस। आज मुख्यमंत्री निवास म जम्मो परिवार संग, अपन माता-पिता संग, अपन लोग-लईका मन संग आए मन के में ह आभार व्यक्त करत हों।
कांति मंडावी घर ले बने मूंगबड़ा ले के पहुंचे रिहिन
मुख्यमंत्री ह भोजन करत केशकाल विधानसभा के ग्राम धनोरा ले आए सुरेंद्र मंडावी ले गोठ बात करत कहिन कि आपके घर हमन अंगना म बईठ के भोजन करे रेहेन। मुख्यमंत्री बघेल ह ए ओमन ल पूछिन कि पहिली बार आए हो कईसे लागत हे। त मंडावी ह खुश होवत कहिन कि आज ओमन अपन पत्नी, भाभी अऊ लईका मन संग आए हे। ओखर पत्नि कांति मण्डावी मुख्यमंत्री बर अपन घर ले बने मंग के बरा ले के पहुंचे रिहिन। मुख्यमंत्री बघेल ह बड़ आत्मीयता ले मूंग-बड़ा के सुआद चखिन अऊ एखर बर ओमन ल धन्यवाद दिन।
No Comment! Be the first one.