raipur : गणेश उत्सव बर जारी हो गे गाइड लाइन, मूर्ति के ऊचाई अउ पंडाल के साइज घलो तय

जय जोहार…. रईपुर जिला प्रसासन ह 10 सितम्बर ले सुरु होवत गणेश उत्सव बर गाइड लाइन जारी कर देहे। ए घांव मूर्ति के ऊचाई ल लेके पंडाल के साइज ल तय कर दे गे हे। जिला प्रसासन डहार ले आयोजक बर 26 ठिन गाइडलाइन जारी करे गेहे। जेखर इस्तेमाल ल करे बिना गणेश प्रतिमा ल स्थापित नई करे जा सकही। एडीएम विनित नंदनवार डहार ले जारी आदेस म केहे गे हे कि जेन आयोजक ह सर्त के उल्लंघन करहि, ओखर खिलाफ कार्रवाई करे जाहि।

जिला प्रसासन डहार ले ए घांव झांकी के घलोअनुमति नई दे गेहे। मूर्ति के साइज 4×4 ले जादा नई होही। (raipur) उहें पंडाल ल घलो 15X15 ले जादा बड़का नई बनाए जा सकही। पंडाल म कुर्सी नई लगही। संगेसंग 20 मनखे मन ले जादा पंडाल म मौजूद होय ल नई दे जाहि।

(raipur) उहें मूर्ति दर्सन बर अवइया मनखे मन ल घलो अपन नाव, पता अउ मोबाइल नंबर ल लिखना होही, ताकि संक्रमित मिले म ओखर कांटेक्ट मिल सके। पंडाल म सीसीटीवी लगाना होही। उहें बिना मास्क पहने मूर्ति दर्सन के अनुमति नई होही ।