नवनीत शुक्ला/मुंगेली । नवागढ़ रोड़ स्टेडियम म बने ओपन जिम परिसर म सुरुआती बरसात म ही छोटे तरिया के रूप लेवत हे । लाखों रुपिया खरचा कर के बने ये स्टेडियम ह अपन निर्धारित मानक स्तर म नइ बन पाइस । बरसात के सुरुआती बेरा म जब ये हाल हे त भरे बरसात म ये ह पूरा तरिया के रूप ले लिही । ओ समय इहा लइका मन बर खेले के कोन जगा रहही, ये ह सोचे के बात हे । गुरूवार के शाम कन होइस बरसात ह ये बात ल साबित करत हे कि ये स्टेडियम ह कतका मानक स्तर ल पूरा कर थे। हमर स्थानीय विधायक अउ प्रदेश सरकार म मंत्री महोदय ले ये गोहर हे कि ये मामला म दखल दे अउ जेन उचित व्यवस्था हवय ओला मुहिया करावय । जेमा लइका अउ स्टेडियम म खेले बर आवइया खेलाड़ी ह अपन हाथ पांव ल सुरक्षित रख सकय । अउ अपन खेल ल आगू बढ़ा सकय ।
