स्वास्थ्य मंत्री सिंहदेव ह करिन मेडिकल कॉलेज अस्पताल म बने कोविड-19 वार्ड के निरीक्षण

जय जोहार…. स्वास्थ्य मंत्री टीएस सिंहदेव ह सरगुजा दौरा म हे। जिहां स्वास्थ्य मंत्री ह सनिच्चर के मेडिकल कॉलेज अस्पताल म कोविड-19 बर बनाये गे विशेष रूम के निरीक्षण करिन। ए दौरान स्वास्थ्य मंत्री ह कहिन कि अंबिकापुर मेडिकल कॉलेज ह कोविड-19 ले लड़े बर तैयार हे। ए वार्ड म मरीज मन के विशेष ध्यान दे जा सकही। डॉक्टर मन के तारीफ करत हुये स्वास्थ्य मंत्री ह बताइस कि नर्स अऊ डॉक्टर ह एक योद्धा जइसन अपन योगदान देवत हे। डॉक्टर मन के रहे बर विशेष रूम घलो बनाये गे हे।

बता देन कि प्रदेश म कोरोना ले संक्रमित मरीज ह लगातार ठीक होवत हे। जेन प्रदेश बर राहत भरे खबर हे। आज एम्स प्रबंधन ह छह मरीज मन ल ठीक होय के बाद अस्पताल ले डिस्चार्ज कर दे हे। जेखर बाद प्रदेश म एक्टिव केस के संख्या ह 10 हे।