Raipur :स्वास्थ्य मंत्री टीएस सिंहदेव ह राष्ट्रीय कृमि मुक्ति दिवस के करीन सुभारंभ

जय जोहार। (Raipur) स्वास्थ्य अउ परिवार कल्याण मंत्री टी.एस. सिंहदेव ह आज रायपुर के अपन निवास कार्यालय मे लईका मन ल एल्बेन्डाजॉल के दवा खिलाके राष्ट्रीय कृमि मुक्ति दिवस के सुभारंभ करीन । वोहा लईका मन ल अपन गोद म लेके स्वयं कृमिनाशक दवा के सेवन कराइन । राष्ट्रीय कृमि मुक्ति दिवस के अंतर्गत प्रदेस के 30 जिला म एक ले 19 बछर तक के 88 लाख 59 हजार लईका अउ किसोर ल एल्बेन्डाजॉल के दवा खिलाए जाही ।

स्वास्थ्य मंत्री श्री सिंहदेव ह किहीन कि पूरा दुनिया म भारत के कुल आबादी ले घलो जादा मनखे पेट म कृमि ले प्रभावित हे । ये लईका मन के सारीरिक अउ मानसिक विकास ल रोकत हे । कृमि कुपोसण अउ एनीमिया के खतरा घलो पैदा करत हे । लईका अउ किसोर ल कृमि के दुष्प्रभाव ले बचाय बर हरेक बछर दू घाँव राष्ट्रीय कृमि मुक्ति दिवस के आयोजन कर कृमिनाशक दवा खिलाए जात हे । वोहा ए अभियान म सबो मनखे मन ले अपन भागीदारी सुनिश्चित करे के आग्रह करीन ।

मंत्री श्री सिंहदेव ह किहीन कि राष्ट्रीय कृमि मुक्ति दिवस म सबो लईका अउ किसोर ल दवा खिलाना सुनिश्चित करे बर प्रदेस भर म 50 हजार 255 सिक्षक, 47 हजार 094 आंगनबाड़ी कार्यकर्ता अउ 63 हजार 435 मितानिन ल प्रसिक्षित करे गेहे। । आज आंगनबाड़ी, सासकीय स्कूल, स्वास्थ्य केन्द्र, अनुदान प्राप्त निजी स्कूल अउ तकनीकी सिक्षा संस्थान म कृमि की दवा के सेवन कराए जात हे।