कवर्धा। कवर्धा जिला के ग्रामीन क्षेत्र मन म खस्ताहाल सड़क मन के चलत एंबुलेंस जरुरतमंद तक नइ पहुंच पावत हे। पेंड्री गांव म एक गरभवती महिला ल एंबुलेंस नइ पहुंचय म खाट म उठाके तीन किलोमीटर चलना पड़िस स्वास्थ्य करयकरता मन ल । तब जाके महिला ल अस्पताल पहुंच पाइस। दरअसल गरभवती महिला समारिन बाई ल प्रसव पीड़ा होय म 102 महतारी एक्सप्रेस ल फोन करे गिस । बोडला मुख्यालय ले पेंड्री जाय बर महतारी एक्सप्रेस रवाना तो होइस लेकिन गांव तक नइ पहुंच पाइस। काबर मुख्य मारग ले गांव तक पहुंचे बर 3 किमी अंदर जाना पडत हे।
तीन किमी के ये मारग कीचड़ ले भर हुए हे जेखर चलत वाहन मन ल आवाजाही प्रभावित हे।अइसे म स्वास्थ्य कारयकरता मन महिला के गांव तक पइदल पहुंचिन जिहां परिजन मन अउ पायलट दिलीप साहू, विदेशी निषाद के संग ग्रामीन स्वास्थ्य कारय करता अमित चन्द्रवंशी ह मउवका के नजाकत ल समझत हुए मरीज ल खाट म ही पइदल गाड़ी तक ले आइन। तीन किमी पइदल आय के बाद वाहन ले बोडला स्वास्थ्य केन्द्र म महिला ल भरती कराय गिस।
ये मामला आघू आय के बाद एक बार फेर विकास के दावा मन के पोल सब के आधू आगे। बोडला ले मात्र 8 किमी दूर म पेड्री गांव जाय बर सड़क न होय ले ग्रामीन मन ल ये प्रकार के समस्या मन बरसात के दिन मन म आय दिन देखे बर मिलही। लेकिन जुम्मेदार बिभाग अउ अधिकारी ये ओर धियान नइ देवत हे। ये मामला म स्वास्थ्य बिभाग व महतारी एक्सप्रेस के भूमिका जरूर प्रसंसनीय हे।
health-workers-who-had-to-walk-three-km
