जय जोहार बेमेतरा…. देश ह कोविड 19 जैसा गंभीर बीमारी ले जूझत हे। मगर कोरोना के जंग म शासन-प्रशासन ह युद्ध स्तर म तैयारी मन म जुट गे हे. जेमा केंद्र सरकार ले लेके राज्य सरकार ह गरीब, मजदूर मन बर नवा-नवा प्लान लावत हे। लेकिन ए बीच कुछु अईसे लोग मन हे जेन कोरोना ल मात दे बर सुर अऊ कला आदि तरीका ले देशवासी मन ले सुरक्षित रहे के अपील करत हे अऊ ओखर हौसला ल बुलंद करत हे।
अईसे ही एक शिक्षक हे ईश्वर प्रसाद घृतलहरे, जेन ग्राम भुरकी के रहवइया हे अऊ ग्राम मुंगरा के शासकीय प्राथमिक शाला म अपन सेवा देवत हे। गौरतलब हे कि शिक्षक ह दिव्यांग हे, लेकिन ओखर हौसला म बड़ा छलांग हे। शिक्षक ह अपन विद्यालय के बच्चा मन ल कला अऊ ज्ञान के माध्यम ले तार्किक, बौद्धिक समेत संगीत के जानकारी देवत हे। शिक्षक ह स्वयं खाली समय मिलत ही स्कूल के किचन गार्डन ल सजाए के अलावा लॉकडाउन के स्थिति म स्कूली बच्चा मन के घर सूखा राशन के वितरण करत हे। शिक्षक ह जब अपन घर म रहत हे त घर के सदस्य मन के संग मिल के घर के कामकाज म घलो अपन हाथ बंटात हे। समय म घर के ट्रैक्टर घलो चलात हे।
