ग्रामीण चिकित्सा सहायक के बढ़ाए जा सकत हे मानदेय, स्वास्थ्य मंत्री सिंहदेव ह दिस संकेत

जय जोहार रायपुर…. ग्रामीण चिकित्सा सहायक (आरएमए) के मानदेय ह बढ़ सकत हे। विधानसभा म स्वास्थ्य मंत्री टीएस सिंहदेव ह ये बात के संकेत दिस। विधायक रजनीश सिंह के सवाल के जवाब म मंत्री सिंहदेव ह बताइस कि प्रदेश के अलग-अलग अस्पतालों म 613 आरएमए नियमित अऊ 573 आरएमए संविदा म काम करत हे।

रजनीश सिंह ह स्वास्थ्य मंत्री ले जानना चाहिस कि आरएमए के संविदाकर्मियों के नियमितिकरण के क्या प्रक्रिया हे अऊ अगर नियमितिकरण नई हो पावत हे, तो नियमित अऊ संविदा म काम करत आरएमए के सैलरी के अंतर ल खत्म कर दे जाए। ये सवाल के जवाब म मंत्री सिंहदेव ह आश्वस्त करिस कि संविदा म काम करत आरएमए के मानदेय म बढ़ोत्तरी के प्रक्रिया ल वो देखही। ये प्रक्रिया ल देखे के बाद वो अपन स्तर ले आरएमए के मानदेय बढ़ाए के जरूर प्रयास करही।