मदिरा के अवैध परिवहन अउ बिकी ऊपर रोक लगावव : आबकारी मंत्री लखन लाल देवांगन
पड़ोसी राज मन ले आउइया दारू ऊपर रोक लगाए के दिन आदिस
रायपुर,प्रदेश के वाणिज्यिक कर (आबकारी) मंत्री लखन लाल देवांगन ह आज नवा रायपुर म जीएसटी भवन म बने आबकारी आयुक्त कार्यालय म बिभागीय काम-बूता के बड़ अकन समीक्छा करिन अउ आघू के महीना मन बर जिला के हिसाब से बिस्तृत कारज-योजना (कार्ययोजना) तइयार करे के आदिस दिन। ए मउका म आबकारी मंत्री ह वित्तीय बछर 2026-27 बर तय राजस्व लक्छ (लक्ष्य) ला पाए बर कड़ा रणनीति अपनाए, दुकान के हिसाब से समीक्छा करे अउ अनुसासन के संग काम ला पूरा करे के निर्देश दिन। बइठका म वाणिज्यिक कर आबकारी बिभाग के सचिव रीना बाबा साहेब कंगाले, आबकारी आयुक्त पदुम सिंह एल्मा, बिसेस सचिव आबकारी देवेन्द्र भारद्वाज, आबकारी मुख्यालय, बेवरेजेस कारपोरेशन, मार्केटिंग कारपोरेशन के अधिकारी मन के संग जिला मन ले आए मैदानी अधिकारी मन उपस्थित रहिन।
जांच चौकी म सीसीटीवी ले रखव नजर
आबकारी मंत्री लखन लाल देवांगन ह राज के दूसर राज मन ले जुड़े सीमा म बने आबकारी जांच चौकी मन म दूसर राज के दारू के खिलाफ बिसेस अभियान चलाए अउ सीसीटीवी कैमरा मन ला बरोबर चालू रख के निगरानी करे के आदिस दिन। ओह जिला अधिकारी मन ला ए घलो आदिस दिन कि दारू के अवैध परिवहन अउ बिकी ऊपर कोचिया मन के खिलाफ कड़ा कारवाही करव। जम्मो जिला अधिकारी ए बात ला पक्का करंय कि आबकारी उपनिरीक्षक अउ ओकर ले छोटे अमला ह अवैध दारू बेचे बइठइया मन के संग कोनो समझौता झन करंय।
जादा दाम म दारू बेचे म होही कारवाही
एकर अलावा बिभाग म मिले सिकात मन ऊपर तुरते कारवाही करे के आदिस घलो दे गिस। ओह अधिकारी मन ला कहिन कि दारू दुकान मन म मनखे मन के मांग के हिसाब से दारू के स्टाक रखना पक्का करव। दुकान मन म मांग के हिसाब से दारू मिलना चाही अउ तय रेट ले जादा दाम म बिकी झन होय। ओह दारू दुकान मन म नियम अउ अनुसासन के कड़ाई ले पालन करवाए के घलो आदिस दिन। दुकान म जतका दारू हे, ओला नियम के मुताबिक रेट के संग रैक म दिखाए बर कहे गिस, ताकि गाहक मन ला साफ-साफ सब पता चल सके अउ सुबिधा होय।
मिलावट करइया मन होही ब्लैकलिस्ट
मंत्री ह बइठका म राजस्व लक्छ के जिलावार समीक्छा करत कहिन कि जिन जिला मन ह अब तक अपन लक्छ ला पा ले हें, ओ मन लगातार काम ला जारी रखंय। वहीं, लक्छ ले पाछू चलत जिला मन ला एकर कारन मन के दुकानवार समीक्छा करके कमी ला पूरा करे बर बिस्तृत कारज-योजना बनाके तुरते अमल म लाए के आदिस दे गिस। बइठका म अधिकारी मन ला ए बात के साफ हिदायत दे गिस कि दारू म ककरो कोति ले मिलावट झन हो पाए। एकर बर जम्मो जिला अधिकारी मन ला समे-समे म अचानक जाके जांच (आकस्मिक निरीक्षण) करे अउ उहां मिले गड़बड़ी ऊपर तुरते कारवाही करे अउ दोसी कर्मचारी मन ला तुरते काम ले निकाल के ब्लैकलिस्ट करे के आदिस दिन। संग ही, दुकान मन म पेटीएम या दूसर कैशलेस भुगतान ला बढ़ावा दे बर अलग से काउंटर बनाए के घलो आदिस दिन।
ढाबा अउ होटल मन के होही अचानक जांच
आबकारी सचिव रीना बाबा साहेब कंगाले ह प्रदेश म चलत बार, क्लब, होटल अउ ढाबा मन के अचानक जांच करे अउ समे के बाद घलो चलाए या अवैध दारू बेचे करइया मन के खिलाफ कठोर कारवाही करे के आदिस दिन। ओह अवैध दारू अउ दूसर नसा के चीज मन के बनाय, परिवहन, तस्करी अउ बिकी ऊपर कड़ा काबू रखे बर जरूरत परे म पुलिस बिभाग ले घलो सहयोग लेए के आदिस दिन।
हमर चैनल ला सब्सक्राइब करव अऊ मया देवव
Whatsapp –https://whatsapp.com/channel/0029VaPmGTXInlqS2WQAhw1n
YouTube –https://youtube.com/@jayjohar?si=AZDI5zciOCT3Oqhw
Facebook –https://www.facebook.com/share/18GsFBTgfd/
