Raipur : राज्य स्तरीय श्रम सम्मेलन म सीएम ह करीन घोसना, दुर्घटना मृत्यु म श्रमिक के परिजन मन ल अब सहायता रासि पांच लाख, दिव्यांगता के स्थिति म मिलही अढ़ई लाख के रासि
जय जोहार। अंतरराष्ट्रीय श्रम दिवस के अवसर म साइंस कालेज मैदान रायपुर म श्रम सम्मेलन के अवसर म मुख्यमंत्री भूपेश बघेल ह श्रमिक हित म बड़का घोसना करीन । वोहा कार्यस्थल म दुर्घटना मृत्यु म पंजीकृत निर्माण श्रमिक के परिजन मन ल मिलइया सहायता रासि एक लाख रुपिया ले बढ़ाके 5 लाख रुपिया अउ स्थायी दिव्यांगता के स्थिति म एमन ल देय रासि 50 हजार ले बढ़ाके अढ़ई लाख रुपिया करे के घोसना करीन । संग ही अपंजीकृत श्रमिक मन के घलो कार्यस्थल म दुर्घटना ले मृत्यु होय म एक लाख रुपिया के सहायता प्रदान करे जाही।
मुख्यमंत्री ह कार्यक्रम म मुख्यमंत्री निर्माण मजदूर मंथली सीजन टिकट कार्ड योजना के घोसना करीन । एखर अंतर्गत जेन पंजीकृत निर्माण श्रमिक अपन घर ले रेल अथवा बस ले कार्यस्थल तक यात्रा करत हे । ओखर बर मासिक टिकट कार्ड एमएसटी जारी करे जाही, ये कार्ड 50 किमी तक के यात्रा बर हो सकही । एखर पूरा व्यय छत्तीसगढ़ भवन अउ अन्य सन्निर्माण कर्मकार मंडल वहन करही ।
एखर संग ही वोहा मुख्यमंत्री निर्माण श्रमिक सहायता योजना के घोसना घलो करीन। एखर अंतर्गत निर्माणी श्रमिक मन ल नवा आवास निर्माण अथवा क्रय बर 50 हजार रुपिया के अनुदान प्रदाय करे जाही । मुख्यमंत्री निर्माण श्रमिक दीर्घायु सहायता योजना के घोसना घलो वोहा करीन । एमा हार्ट सर्जरी, लीवर ट्रांसप्लांट, किडनी ट्रांसप्लांट, न्यूरो सर्जरी, रीढ़ की हड्डी की सर्जरी, पैर के घुटने के सर्जरी, कैंसर, लकवा जइसे गंभीर बीमारी के इलाज म सासन के स्वास्थ्य विभाग के योजनाके अतिरिक्त घलो 20 हजार रुपिया के अनुदान निर्माणी श्रमिक मन ल मिल सकही ।
ए मउका म अपन संबोधन म मुख्यमंत्री ह किहीन कि आज 56 करोड़ रुपिया ले जादा के रासि डीबीटी के माध्यम ले श्रमिक मन ल हस्तांतरित करे जावत। हम मनखे ह श्रमिक मन के खाता म सीधा रासि के हस्तांतरण करत हन, ताकि श्रमिक ह अपन जरूरत के सामग्री ल क्रय कर सके। मुख्यमंत्री ह ए मौके म श्रमिक मन के सहायता बर हेल्पलाइन नंबर घलो जारी करे गीन । टोल फ्री नंबर 07713505050 म काल कर श्रमिक श्रम विभाग के योजना के जानकारी ले सकत हे अउ अपन समस्या घलो रख सकत हे ।
