कोरोना ले लड़े के नाम म केन्द्र सरकार अऊ रेलवे के तरफ ले खिलवाड़ सरलघा जारी – शैलेश नितिन त्रिवेदी
जय जोहार…. रेलवे के तरफ ले नियुक्ति आदेश ल जारी करे के बाद घलो पूरा मई महिना बीत जाय म नियुक्ति न करे म कांग्रेस ह सवालिया निशान खड़े करे हे। प्रदेश कांग्रेस संचार विभाग के प्रमुख शैलेश नितिन त्रिवेदी ह कहिन कि कोरोना ले लड़े के नाम म केंद्र सरकार अऊ रेलवे के तरफ ले खिलवाड़ ह सरलघा जारी हे। ए 21 डॉक्टर मन के नियुक्ति ह एक मई ले होना रहिस, लेकिन पूरा महिना ह बीत जाय के बावजूद रेलवे ए दिशा म कोनो कार्यवाही नई करे हे।
वो हा कहिन कि रेलवे ह 2500 डॉक्टर अऊ 352 नर्स मन के तैनाती के झूठा अऊ खोखला दावा ल करे रहिस। छत्तीसगढ़ म घलो डॉक्टर मन के पद बर विज्ञापन निकाले गिस अऊ साक्षात्कार घलो ले गिस। 20 अप्रैल के 21 डॉक्टर मन के नियुक्त आदेश जारी करे गिस। ए डॉक्टर मन ल एक मई ले ड्यूटी ज्वाइन करे ल रहिस, लेकिन आज तक ए डॉक्टर मन के ड्यूटी ज्वाइन नई कराय गे हे। एखर ले केन्द्र सरकार अऊ रेलवे के कोरोना ले लड़े के गंभीरता ल लेके सवालिया निशान खड़े हे गे हे।
