बलौदाबाजार-भाटापारा जिला म काली 319 गौठान समेत सब्बो ग्राम पंचायत म मनाय जाही रोका-छेका

जय जोहार…. बलौदाबाजार-भाटापारा जिला म काली 319 गौठान समेत सब्बो ग्राम पंचायत म रोका-छेका मनाय जाही। जिला पंचायत के सीईओ डॉ फ़रिहा आलम सिद्दीकी ह बताइस कि कलेक्टर के निर्देश म पूरा जिला म एला मनाय के निर्णय ले गे हे।

जेमा अलग-अलग विभाग कृषि, पशुपालन, आरईएस, उघानिकी, सहकारिता अऊ मतस्य के एक संयुक्त कार्यक्रम गौठान अऊ सब्बो ग्राम पंचायत म करे जाही। आज सब्बो कार्यक्रम बर नोडल अधिकारी के घलो नियुक्ति कर दे गे हे। ।
सीईओ डॉ फ़रिहा ह बताइस कि सब्बो गौठान म ए कार्यक्रम के दौरान कंपोस्ट खाद के वितरण, गौठान ले संबद्ध स्व सहायता समूह के तरफ ले उत्पादित सामग्री के प्रदर्शन, पशु के स्वास्थ्य परीक्षण, टीकाकरण ,पशु शिविर के व्यवस्था, पशुपालन मछ्ली पालन बर किसान क्रेडिट कार्ड बनाय ल शिविर के आयोजन करे जाही।

संगेसंग कृषि, पशुपालन ,मछली पालन ले सम्बंधित नवा तकनीकी अऊ योजनाओं के बारे में जानकारी अऊ गौठान म पैरा संग्रहण अऊ भंडारण बर एक विशेष अभियान घलो चलाय जाही।