मुख्यमंत्री ह सुशासन तिहार के बेरा म रायगढ़ म एफएसएल लैब के करिन शुभारंभ

अत्याधुनिक प्रयोगशाला के सुरू होए ले रायगढ़, सक्ती अउ सारंगढ़-बिलाईगढ़ जिला मन के पुलिस जांच ब्यवस्था ल बड़ मजबूती मिलिही

स्थानीय स्तर म होही वैज्ञानिक जांच, अपराध अनुसंधान ल मिलिही नवा रद्दा

अत्याधुनिक मोबाइल फॉरेंसिक यूनिट ले मजबूत होही पुलिस विवेचना

सुशासन तिहार के मउका म मुख्यमंत्री विष्णुदेव साय ह रायगढ़ के राजामहल के तीर म क्षेत्रीय न्यायिक विज्ञान प्रयोगशाला (एफएसएल लैब) के विधिवत सुभआरंभ करिन। ए अत्याधुनिक प्रयोगशाला के सुरू होए ले रायगढ़, सक्ती अउ सारंगढ़-बिलाईगढ़ जिला मन के पुलिस जांच ब्यवस्था ल बड़ मजबूती मिलिही। अब हत्या, दुष्कर्म, आत्महत्या अउ एनडीपीएस जइसन गंभीर मामला मन के वैज्ञानिक जांच बर नमूना मन ल बिलासपुर भेजे के जरूरत अब्बड़ हद तक खतम हो जाही।

मुख्यमंत्री श्री साय ह कहिन कि राज्य सरकार ह कानून ब्यवस्था ल आधुनिक तकनीक अउ वैज्ञानिक जांच प्रणाली ले मजबूत बनाए बर लगातार काम करत हावय। आज के समे म अपराध मन के जांच ह सिरिफ पारंपरिक तरीका मन ले संभव नई हे। वैज्ञानिक साक्ष्य अउ फॉरेंसिक जांच ह अपराधी मन तक पहुंचे के सबले प्रभावी माध्यम बन चुके हें। रायगढ़ म ए अत्याधुनिक प्रयोगशाला के सुरू होए ले पुलिस ल बड़ सुबिधा मिलिही अउ अपराध अनुसंधान ह जादा प्रभावी होही।

वित्त मंत्री ओ.पी.चौधरी ह क्षेत्रीय न्यायिक विज्ञान प्रयोगशाला के सुभआरंभ ल रायगढ़ जिला बर ऐतिहासिक कदम बतावत कहिन कि मुख्यमंत्री विष्णुदेव साय के अगवाई म प्रदेश म कानून ब्यवस्था ल आधुनिक तकनीक अउ वैज्ञानिक संसाधन मन ले मजबूत करे जात हावय। ओमन कहिन कि रायगढ़ म एफएसएल लैब सुरू होए ले अपराध जांच के प्रक्रिया ह तेज, पारदर्शी अउ प्रभावी बनही। अब स्थानीय स्तर म ही वैज्ञानिक परीक्षण होए ले पुलिस ल समे म जांच रिपोर्ट मिलिही अउ पीड़ित मन ल तुरते नियाव मिल सकही।

ये बात ह उल्लेखनीय हावय कि अब तक पुलिस ल ब्लड सैंपल, विसरा, स्लाइड, मादक पदारथ, केमिकल अउ अल्कोहल जांच बर बिलासपुर म बने विधि विज्ञान प्रयोगशाला म निर्भर रहे बर परत रहिस। एकर ले जांच के प्रक्रिया म समे लगत रहिस अउ कतकोन मामला मन के निरकरण म देरी होत रहिस। फेर रायगढ़ म क्षेत्रीय एफएसएल सुरू होए के बाद जादा करके परीक्षण ह स्थानीय स्तर म ही संभव होही। एकर ले विवेचना के समे-सीमा घटही अउ लंबित मामला मन के निपटारा म तेजी आही।

ए मउका म लोकसभा सांसद राधेश्याम राठिया, राज्यसभा सांसद देवेन्द्र प्रताप सिंह, नगर निगम रायगढ़ के महापौर जीवर्धन चौहान, कलेक्टर मयंक चतुर्वेदी, वरिष्ठ पुलिस अधीक्षक शशि मोहन सिंह सहित दूसर जनप्रतिनिधि, प्रशासनिक अधिकारी, गणमान्य नागरिक अउ भारी संख्या म ग्रामीण मन उपस्थित रहिन।