मुंगेली जिले म आपराधिक घटना मन म इजाफा… प्रशासन के उदासीनता बनिस वजह

नवनीत शुक्ला

मुंगेली। जिला बनने के बाद ले लगभग हर बरिस बाहरी लोगन के आना जाना बढ़ोतरी होवत हे। जेखर संगेच जिला म आपराधिक घटना मन म घलोक इजाफा होवत हे। एमा न त जिला प्रशासन अउ न पुलिस प्रशासन ह रूचि लेवत हे।

दरअसल प्रशासन के उदासीनता के वजह ले न त अइसन लोग म के कोनो रिकॉर्ड थाना म हे अउ न  मकान मालिक मन ह अपन किरायादार मन के जानकारी बेरा- बेरा म थाना म देवत हे।  इहीं वजह ले न त बाहर ले आए लोगन  मन उपर प्रशासन के पकड़  नइ बने रहय। अइसन लोगन मन ह आपराधिक घटना मन ल अंजाम देके आसानी ले निकल जात हे अउ  प्रशासन बुत  बराबर खड़े देखत रहिथे। पाछू दिन म पेट्रोल पंप मन म  डकती के मामला आघू आए रहिस हे।  जेमा पकड़े गे अपराधी बाहिर के रहिन हे।

आज अइसन ही एक मामला चिल्फी चौकी म घटित होइस, जिहाँ गुड़ फैक्ट्री म बइगा मजदूर मन ल बंधक बनाय गिस।  इहां 5 नाबालिग समेत 11 मजदूर सामिल रहिन हे। ए गुड़ फैक्टरी भाजपा नेता शत्रुहन साहू के हवय। परिजन मन ह  एसडीएम ले शिकायत  करिन। जेमा एसडीओपी तेजराम पटेल मउका म पहुंच के मजदूर मन ल रिहा कराइस हे।

“ थाना प्रभारी मन ल किराएदार मन के जानकारी एकत्रित करे बर  आदेस कर दे गेहे। एखर अलावा बेरा-बेरा म  मउसमी उद्योग चलाइया लोगन मन ले घलोक उंखर इहां कार्य करइया  श्रमिक मन के जानकारी ले जात हे। ”

तेजराम पटेल…., एसडीओ,  पुलिस मुंगेली