बाड़ी विकास योजना ले गांव के अर्थव्यवस्था ल मिलिस मजबूती, खुल के आवक के रद्दा
रायपुर. मुख्यमंत्री भूपेश बघेल के सुराजी ग्राम योजना गांव म रहवईया मनखे मन बर कोनों वरदान ले कम नई हे। आज उहां के लोगन मन के आर्थिक उन्नति के रद्दा बर ए योजना ह लाभकारी साबित होवत हे। नरवा, गरुवा, घुरवा अऊ बारी योजना के अंतर्गत चलईया बाड़ी विकास योजना ह ग्रामीण अर्थव्यवस्था ल मजबूत करे म बड़का भूमिका निभाए हे। जेखर ले गांव म रहवईय़ा मनखे मन ल अपन घर के दुआरी म आय के जरिया मिल गे। कोरिया जिला म अईसने कई परिवार हे जेन मन के सफलता ह खुदेच कहानी ल कहत हे।
कोरिया जिला के सोनहत विकासखंड के कुशहा गौठान म बाड़ी विकास योजना ले लक्ष्मी महिला स्व सहायता समूह के महिला मन गौठान म मक्का अऊ पताल (टमाटर) लगाए हे। समूह की सदस्य अनिता बतात हे कि पाछू के सीजन म सिरिफ एक हजार रुपिया के लागत ले पताल उगाए रिहिन जेखर ले ओमन ल 7 हजार के मुनाफा होईस। ओमन बताईन कि पहिली घर के जरूरत के हिसाब ले सब्जी लगावत रिहिस फेर आज समूह संग मिलके गोठान म बड़का स्तर ले बाड़ी के बुता करे सोचिन जेखर ले रोजगार मिलत हे।
![पहिली घर खाए बर उगाए सब्जी फेर आज गौठान म होवत हे बड़का उत्पादन 1 badi vkas yojna 3](https://jayjohar.com/wp-content/uploads/2023/05/badi-vkas-yojna-3.jpeg)
अईसनहा विकासखण्ड बैकुण्ठपुर के मझगंवा गौठान के प्रगति महिला स्व सहायता समूह के महिला मन घलो बाड़ी के बुता म लग के अपन आवक ल बढ़ावत हे। समूह के अध्यक्ष शमशुन निशा ह कहिथे कि समूह के गठन के संगे-संग ओमन गौठान म किसम-किसम के उदिम ले जुड़के बुता करत हे। समूह के सचिव अंजुलता ह बताईन कि लगभग 10 महीना ले हमन बाड़ी के विकास बर बुता करत हन। अभी के बेरा म इहां भांटा (बैगन), मिरचा (मिर्च), पताल (टमाटर) के संगे-संग एलोवेरा अऊ लेमनग्रास के घलो खेती करत हे। जेखर बेचे ले महिला समूह ल 70 हजार रुपिया के आमदनी होए हे। एखर संगे-संग सरलगहा मुनाफा बाढ़त हे। तीर-तखार के बाजार म सब्जी मन के खपत हो जाथे। महिला मन कहिथे कि हमन जेन काम करत हन ओखर ले अच्छा आमदनी हो जात हे अऊ ओखर मन के आर्थिक दसा सुधरत हे। उहें घर परिवार के जरूरत बर कोनों के आगू हाथ फैलाए के नौबत नई आए। समूह के महिला मन ए योजना ल लाए बार मुख्यमंत्री भूपेश बघेल के आभार घलो व्यक्त करिन।
![पहिली घर खाए बर उगाए सब्जी फेर आज गौठान म होवत हे बड़का उत्पादन 2 badi vkas yojna 1](https://jayjohar.com/wp-content/uploads/2023/05/badi-vkas-yojna-1-1024x768.jpeg)
No Comment! Be the first one.