मुंगेली। छत्तीसगढ़ संयुक्त प्रगतिशील करमचारी महासंघ के प्रांतीय आह्वान म जिला के समस्त अनियमित करमचारी मन ह सोमवार ले कलेक्ट्रेट के तीर अपन 4 सूत्रीय मांग मन ल लेके भारी बारिस म धरना प्रदर्सन कर अनिश्स्चितकालिन हड़ताल के शंखनाद करे गिस।
झमाझम बारिस म घलो कर्मचारी अपन मांग मन ल लेके प्रदर्सन करत रहे। धरना प्रदर्सन म पदाधिकारी मन ह कहिन के नियमितीकरन बर संगठन 27 जिला मन ले समस्त अनियमित करमचारी 16 जून 2018 के रायपुर राजधानी म एकत्रित होके रइली निकाल के मुख्यमंत्री डॉ. रमन सिंह ल नियमित करे बर ज्ञापन सउपे गिस।
3 जुलाई के रायपुर म एक दिवसीय महासभा कारयक्रम म सामिल होके सासन ल अपन मांग मन ले अवगत कराय गे रहिस हे। सासन से अनुकूल निरनय के इंतजार म जिला इकाई द्वारा 10 जुलाई ले 13 जुलाई 2018 तक विभागीय कार्य मन के अतिरिक्त भोजन अवकास के बेरा म सासन के धियान अपन ओर आकरसित करे बर जन-जागरूकता कारयक्रम चलाय गिस।
