दुनिया को झुकाने की ताकत रखथे भारत : बृजमोहन

देशभक्ति गीत मन के कार्यक्रम म दीस आतंकवादी हमला म शहीद होए वीर मन ल श्रद्धाजंलि

रायपुर : मुक्ताकाशी मंच संस्कृति विभाग परिसर रायपुर म पुलवामा म शहीद जवान मन ल श्रद्धांजलि दे बर देश भक्ति गीत नृत्य कार्यक्रम अब तुम्हारे हवाले वतन साथियों के आयोजन करे गिस.

ए कार्यक्रम म रायपुर दक्षिन के विधायक अउ प्रदेश के पूर्व मंत्री बृजमोहन अग्रवाल समेत सैकड़ों लोगन मन ह हिस्सा लिस अउ शहीद मन ल अपन भावभीनी श्रद्धांजलि अर्पित करिन. संध्या 7:00 बजे ले प्रारंभ ए गीत संगीत के आयोजन ले पूरा वातावरन देस भक्ति ले भर गिस. भाव विभोर कर देवइया गीत मन ल लोगन मन के आंसू छलके लगिन.

ए अवसर म बृजमोहन अग्रवाल ह शहीद मन ल श्रद्धांजलि देवत हुए अपन विचार रखिन. उमन कहिन के, आज हम खुले हवा म जे सांस लेवत हन, सुकून के जिनदगी जीवत हन, एखर श्रेय पूरी तरह ले भारतीय सेना ल जाथे. जे सीमा म अपन जान के परवाह करिन. बगैर कठिन ले कठिन परिस्थिति म घलोक मजबूती के संग खड़े हवय अउ देश के रक्षा करत हे.

उमन वायुसेना के बहादुर कैप्टन अभिनंदन के जिक्र करिन अउ कहिन के, अपन फाइटर प्लेन मिग ले पाक के कई गुना बड़का विमान ल नेस्तानाबूत करके अभिनंदन ह अदम्य साहस के परिचय देय हे. पाकिस्तान के हाथ म पकड़े जाए के बाद घलो उंखर हउसला देखत बनत रहिसहे. उंखर चेहरा के चमक ले हर भारतवासी गउरवान्वित महसूस करत हवय.

हमार बर ए खुशी के बात रहि के भारत के सैन्य ताकत, कूटनीतिक ताकत के आघू पाकिस्तान ढेर होगे अउ हमार वीर योद्धा अभिनंदन सकुशल पाकिस्तान ले लउटके भारत आ गिस. बृजमोहन ह कहिन के, आज दुनिया म भारत एक महासक्ति के रूप म उभरे हे. आज भारत के तीर दुनिया ल झुकाए के ताकत हे.

उमन पुलगावां शहीद होए जवान मन, मेजर ढौंडियाल ल भावभीनी श्रद्धांजलि अर्पित करिन। उमन आयोजनकर्ता शरद अग्रवाल अउ पूरी टीम ल ए देसभक्तिपूर्ण सफल आयोजन बर सुभकामनाएं दीस.