वेदांता पावर प्लांट हादसा ऊपर उद्योग मंत्री ह जताइस गहरा सोक
रायपुर. वाणिज्य, उद्योग अऊ सार्वजनिक उपक्रम मंत्री लखनलाल देवांगन ह सक्ती जिला के डभरा ब्लॉक के ग्राम सिंघीतराई मा स्थित वेदांता लिमिटेड के पावर प्लांट मा बॉयलर फटे ले होय दुर्घटना मा मनखे मन के जान जाय ऊपर गहिर सोक जताय हें।
मंत्री श्री देवांगन ह ए घटना ला बहुते दुखद अऊ पीड़ादायक बतावत, मृतक मन ला श्रद्धांजलि अर्पित करीन अऊ सोक मा डूबे परिवार मन बर अपन संवेदना प्रकट करीन। ओ मन कहिन कि ए हादसा मा मजूर मन के मउत अऊ कतको झन के घायल होय के खबर ह मन ला बहुते दुखी कर दे हे। ओ मन भगवान ले मरे हुए आतमा मन के सांति अऊ परिवार के मनखे मन ला ए दुख ला सहे के सकति दे बर प्रार्थना करीन।
उद्योग मंत्री ह बताईस कि घटना के जानकारी मिलत खानी कलेक्टर अऊ पुलिस अधीक्षक ले फोन मा गोठ-बात करके जिला प्रसासन ला तुरते मौका मा पहुँच के बचाव काम सुरू करे के निरदेस दे गीस। अभी प्रसासन के देख-रेख मा तेजी ले राहत के काम चलत हे अऊ घायल मन ला तुरते अऊ बढ़िया इलाज के सुबिधा पहुँचाय जावत हे।
ओ मन अधिकारी मन ला निरदेस दीन कि कोनो घलो घायल के इलाज मा कोनो कमी झन होवय अऊ जरूरत के हिसाब ले बेहतर ले बेहतर डाक्टरी सुबिधा मिले। संगे-संग ओ मन घायल मन के जल्दी नीक होय के कामना घलो करीन।
मंत्री श्री देवांगन ह साफ तौर मा कहिन कि ए घटना के गहिर अऊ निष्पक्ष जाँच कराय जाही। ओ मन कहिन कि जाँच मा जे मन घलो दोसी पाय जाहीं, ओ मन के ऊपर श्रम क़ानून के तहत कड़ा ले कड़ा कारवाही करे जाही, ताकि आगू अइसन घटना दोबारा झन होवय।
