एनआईसीयू वार्ड ल सुविधाजनक जगा म हटाए बर जल्दी कार्यवाही करे के निरदेस दीस सिंहदेव ह

बिलासपुर।  प्रदेस के स्वास्थ्य मंत्री टीएस सिंहदेव सिम्स अस्पताल बिलासपुर पहुंचिन। उमन ह एनआईसीयू वार्ड ल पावर पेनल ले दूरिहा आन जगा म हटाए के निरदेस दीन। गउरतलब हे के दू दिन पहिली पॉवर पेनल म लगे आगी  ले नवजात लइका मन के एनआईसीयू वार्ड म धुगिया भर गए रहिस। जेखर वजह ल लइका मन ल दूसर अस्पताल म भरती करे गिस। ए दुरघटना म दू लइका क मउत हो गेहे।

  स्वास्थ्य मंत्री ह एनसीयू वार्ड म घटना के बेर म तइनात नर्स मन ले बातचीत करिन अऊ घटनाक्रम के विस्तृत जानकारी लीन। सिम्स के डॉक्टर भानूप्रताप सिंह ह ओ मन ल पूरा घटनाक्रम ले अवगत कराइन। उमन बताइन के कन्ट्रोल पेनल म आगी लगे के बाद एनआईसीयू म धुगिया फइल  गिस, संगेच वार्ड के बिजली घलोक गुल हो गीस। नवजात सिसु मन ल उहां ले निकाल के 15 मिनट के भीतरेच स्त्रीरोग विभाग म परिचारिका, चिकित्सक अउ ऑक्सीजन सिलेण्डर संग सिफ्ट कर देगे रहिस। जिहां ले उमन मन ल इलाज बर निजी अस्पताल अऊ जिला चिकित्सालय म भेजेगे रहिस।

एखर बाद सिंहदेव ह अस्पताल के एनआईसीयू वार्ड ल सुविधाजनक जगा म हटाए बर जल्दी कार्यवाही करे के निरदेस दीन।  स्वास्थ्य सिंहदेव रेडियो डायगोनिक विभाग म घलोक गइन अऊ गैस मेनिफोल्ड रूम के जायजा लिए अउ एला घलोक तुरंते अस्पताल के दूसर जगा म हटाए के निरदेस दीन। एखर बाद सिंहदेव  ह निजी अस्पताल मन म घलोक गइन, जिहां सिम्स ले भेजे गये लइका मन के इलाज होवत हे। उमन लइका मन के स्वास्थ्य के हालचाल जानिन अऊ परिजन मन ले बातचीत करिन। उमन बताइन के घटना के जांच बर टीम गठित करे दे गिस हे। जेकर रिपोर्ट आए के बाद दोसी मन उपर कार्यवाही होही। सिंहदेव के संग बिलासपुर विधायक शैलेष पाण्डेय, कलेक्टर डॉ. संजय अलंग अऊ सिम्स के डीन डॉ. डीके पात्रा घलोक उपस्थित रहिन।

–