राजधानी म बनही अंतरराष्ट्रीय टेनिस स्टेडियम, टेंडर के प्रक्रिया ह जारी

जय जोहार…. राजधानी रायपुर के कृषि विश्वविद्यालय के पास करीब 17 करोड़ के लागत ले अंतरराष्ट्रीय टेनिस स्टेडियम के निर्माण करे जाही। मुख्यमंत्री भूपेश बघेल ह टेनिस एकेडमी अऊ टेनिस स्टेडियम बर भूमि आबंटन करे हे। संगेसंग एकेडमी निर्माण बर तुरते टेंडर जारी करे के निर्देश दे हे। जेखर प्रक्रिया ह अंतिम चरण म हे अऊ 29 मई के टेंडर ह खुल जाही।

छत्तीसगढ़ प्रदेश टेनिस संघ के महासचिव गुरुचरण सिंह होरा ह कहिन कि मुख्यमंत्री भूपेश बघेल के खेल जगत बर ए सबसे बड़का घोसना हे। वो हा कहिन कि वो ए संबंध म सरलघा परयासरत रहिस। खेल सचिव सिद्धार्थ कोमल परदेशी ले घलो वो हा ए संबंध म आग्रह करिन। जेखर सकारात्मक परिणाम प्राप्त होय हे। ए टेनिस स्टेडियम अऊ एकेडमी के निर्माण ह प्रदेश टेनिस बर एक मील के पत्थर साबित होही। भविष्य म राज्य ले कई अंतरराष्ट्रीय खिलाड़ी ह निकलही।