नागरिक आपूर्ति निगम आफिस पहुंचिस ईओडब्लू के टीम….जांच सुरू

रायपुर। छत्तीसगढ़ के बहुचर्चित नागरिक आपूर्ति निगम (नान) घोटाला मामला  म जांच बर शुक्रवार के आर्थिक अपराध अन्वेषण ब्यूरो (ईओडब्लू) के टीम नान कार्यालय पहुंचिस।  एसपी कल्याण एलेसेला के नेतृत्व म ईओडब्लू टीम छापामारी करच हवय। नान घोटाला म 16 लोगन ल आरोपी बनाय गेहे। एसआईटी बने के बाद पहली बार ईओडब्लू के टीम  नान कार्यालय पहुंचे हे।

बता देन के नान घोटाला म आरोप हे के  छत्तीसगढ़ म राइस मिलर मन ले  लाखों क्विंटल घटिया चावल लेय गे हे। अउ एखर बदला म करोड़ों रुपिया के रिश्वतखोरी करे गेहे।  अइसनेह नागरिक आपूर्ति निगम के ट्रांसपोर्टेसन म घलो भारी घोटाला करे गेहे। ए मामला म  27 लोगन के खेलाफ मामला दर्ज करे गेहे। जेमा 16 के खेलाफ 15 जून 2015 के अभियोग पत्र पेस करे गेहे।  जबकि मामला म दू वरिष्ठ आईएएस अधिकारी डॉ. आलोक शुक्ला अउ अनिल टूटेजा के खेलाफ कार्रवाई के अनुमति  बर  केंद्र सरकार ल चिट्ठी लिखे गेहे।

  कथित रूप ले 36 हजार करोड़ रुपिया के नान घोटाला म नवां सिरा ले  जांच बर भूपेश सरकार ह एसआईटी गठित करे हे। एसआईटी ह मामला म जांच घलो सुरू कर दीस हे।  दूसर कोती, ए मामला म पीएमएलए (प्रिवेंशन ऑफ मनी लॉन्ड्रिंग एक्ट) के तहत ईडी ह जांच सुरू कर दे हे।