chhattisgarh : 5 सूत्री मांग ल लेके अनियमित कर्मचारी मन ह 8 मार्च के करही विधानसभा घेराव, पढ़व
जय जोहार। (chhattisgarh) 5 सूत्री मांग ल लेके छत्तीसगढ़ संयुक्त अनियमित कर्मचारी महासंघ ह 8 मार्च के विधानसभा घेराव करे के निर्णय लेहे। महासंघ के प्रांतीय अध्यक्ष रवि गडपाले ह बताइन कि मुख्यमंत्री भूपेश बघेल, स्वास्थ्य मंत्री टी.एस. सिंहदेव अउ दूसर कांग्रेस वरिष्ठ जनप्रतिनिधि मन ह हमर मन के संघर्ष के दिन म हमर मंच म आइन अउ ओखर सरकार बनाय म हमन ल 10 दिन म नियमित करे के वादा करीन।
वो हा बताइन कि वादा के अनुरूप हमर मन के मांग ल कांग्रेस के जन-घोसना (वचन) पत्र “दूर दृष्टि, पक्का इरादा, कांग्रेस करही पूरा वादा” के बिंदु क्रमांक 11 एवं 30 म अनियमित कर्मचारी मन के नियमितीकरण करे ल, छटनी नई करे ल अउ आउट सोर्सिंग ल बंद करे ल स्थान दीन| चुनाव के दउरान अनियमित कर्मचारी मन के नियमितीकरण ल घलो कांग्रेस ह प्रमुखता ले उठाये रिहीन|
मुख्यमंत्री ह 14 फरवरी 2019 के अनियमित कर्मचारी मन के मंच ले पुनः ए बछर किसान मन बर, अवइया बछर कर्मचारी मन बर बात किहीस | 3 बछर ले जादा बेरा होय के बाद घलो सरकार डहार ले नियमितीकरण के कार्यवाही ल नई करे जात हे। ए सम्बन्ध म छत्तीसगढ़ (chhattisgarh) संयुक्त अनियमित कर्मचारी महासंघ ह मुख्यमंत्री अउ मुख्य सचिव ले मिले बर घलो कई घांव अनुरोध पत्र प्रेसित करीन, परन्तु मिले के बेरा नई दे गेहे ।
श्रीकांत लास्कर, टीकमचंद कौशिक, तारकेश्वर साहू, टेकलाल पटले, धर्मेन्द्र वैष्णव ह किहीन कि सरकार के ए व्यवहार ले प्रदेस के लाखो अनियमित कर्मचारी/अधिकारी ह ठगा महसूस करत हे अउ आक्रोसित है| हमर मन के मांग म सरकार के धियान ल मजबूती ले आकृष्ट करे ल 8 मार्च के विधानसभा घेराव करे के निर्णय ल महासंघ ह लेहे।
