हजारों एलबम अऊ सैकड़ा भर ले ज्यादा फिलिम के पोस्टर बनईया मंडल बंधु ल घलो हे स्थापित फिलिम इंड्रस्ट्री के आस
दीपक बावनकर
जय जोहार. छत्तीसगढ़ म बनईया अईसे कोनों फिलिम नई होही जेखर पोस्टर के डिजाईन मंडल बंधु मन नई करे होही। बात लगभग 18 साल जुन्ना हरे जब सिजनेबल वीडियो एल्बम ही छत्तीसगढ़ म बनाए जात रिहिस। तब के बेरा म सुंदरानी वीडियो वर्ल्ड, सुमन वीडियो अऊ एस. जी. कैसेट कंपनी के अपन अलग जलवा रिहिस। उही समय ले उत्तम मंडल अऊ विष्णु मंडल ह अपन काम ल शुरू करे रिहिन। तब ले लेके अब तक इही आस म हाबे कि ओ दिन जरूर आहि जब हमर फिलिम इंड्रस्ट्री के दिन सुधरही।
एलबम अऊ कवर डिजाइनिंग ले शुरू होवईया ऐ सफर ह मंडल बंधु अब फीचर फिलिम के दौर म पहुंच गे हे। सैकड़ा भर ले ज्यादा फिलिम के पोस्टर डिजाईन कर चुके मंडल बंधु ल अपन सबो पोस्टर अब्बड़ भाथे। मंडल ग्राफिक के विष्णु मंडल ह बताईन कि अच्छा ले बारीके ले काम करे जाए त बढ़िया अऊ आकर्षक पोस्टर तैयार करे म एक महीना के समय ह लागथे। ओमन ह अपन ऑफिस म फोटो सेशन के व्यवस्था घलो रखे हे। फिलिम टाइटल के हिसाब ले एक्स्ट्रा फोटोशूट लगाथे। मंडल बंधु मन अपन पीड़ा बतात कहिथे कि अभी काम के कीमत पहिली ले दोगुना त हो गे हे लेकिन पहिली जेन मजा काम करे म आत रिहिस लेन मजा अब नई आए। उत्तम मंडल ह कहिथे कि दर्शक मन पहिली सिनेमाघर म पोस्टर देखत रिहिन त उही फिलिम ल देखे बर दर्शक जातिन जेखर पोस्टर आकर्षक लागे। जे पोस्टर म दम नहीं राहे त दर्शक बाहिर ले लौट जाए। ओमन कहिथे कि छत्तीसगढ़ी सिनेमा के भला अऊ बुरा दोनों दौर गुजर चुके हे अब ओमन ल आस हे त एक स्थापित छत्तीसगढ़ी सिनेमा उद्योग के।
