कांग्रेस के मिशन 11 झटका, ‘गुप्त सर्वे’ म 5 सीट मन म पिछड़त हे प्रत्याशी

रायपुर. लोकसभा चुनाव के तइयारी मन म छत्तीसगढ़ कांग्रेस के मिशन 11 ले ओ बेरा म झटका लगिस जब आंतरिक सर्वे म पार्टी 11 म ले 5 सीट मनम पिछड़त नजर आवत हे.

छत्तीसगढ़ राज्य गठन के बाद अब तक होए कुल तीन लोकसभा चुनाव म तीनों दफा कांग्रेस 11 म से महज 1 सीट जीते म कामयाब रिहीस हे. बछर 2018 म होए विधानसभा चुनाव म मिले बंपर जीत के बाद कांग्रेस ह लोकसभा चुनाव बर मिसन 11 तय  करे हे, लेकिन ये मिशन ल बड़ा झटका लगिस हे.

सूत्र मन के मुताबिक, एक गुप्त सर्वे म कांग्रेस जांजगीर-चाम्पा, बिलासपुर, रायपुर, महासमुंद समेत दुर्ग लोकसभा सीट म पाछू चलत हे. येखर ले आला नेतामन के धड़कन मन तेज हो गिस हे. दरअसल, कांग्रेस ह जे जातिगत कार्ड खेले हे, वो ह ये सीट मन म सटीक बइठत दिखाई नई देवत हे. मसलन बात अगर दुर्ग लोकसभा के करय त करीब 19 लाख मतदातामन वाले ये सीट म साढ़े पांच लाख के करीब साहू वोटर हे जे करीब 29 फीसदी होवत हे. लेकिन, कांग्रेस ह इहां ले कुर्मी प्रत्याशी ल मइदान म उतारिस हे. उहे, बीजेपी ह घलो कुर्मी प्रत्याशी मइदान म उतार के  मामला उलझा दिस हे. जातिगत समीकरन के कारन अन्य चार सीट मन म घलो कांग्रेस उलझत जात हवय.

प्रदेस म भले ही कांग्रेस मिशन 11 लेके चलत हवय, लेकिन गुप्त सर्वे अउ समीकरन ये बताए बर काफी हे, के कांग्रेस पांच सीट मन म बेहतर स्थिति म दिखाई नई देवत हे. ये बात अलग हे के कांग्रेस प्रवक्ता येला सामान्य सर्वे करार देवत हवय. कांग्रेस प्रवक्ता विकास तिवारी के कहिना हे के कुछु सीट मन म आघू या पाछू रहे के सर्वे आत रहिथे, लेकिन ये बेर प्रदेस के सबो 11 सीट मन म कांग्रेस ल जीत मिलही.

उहें, दूसर ओर भाजपा प्रवक्ता केदारनाथ गुप्ता के कहिना हे के न सिरिफ पांच बल्कि प्रदेस क जम्मो 11 सीट मन म भाजपा ल जीत मिलही.कांग्रेस भले ही ये रिपोर्ट ल सार्वजनिक रूप ले स्वीकार नई करय, लेकिन ये त तय हे कि  ये रिपोर्ट के आघू आय ले कांग्रेस के भीतर खाना म हलचल मचगे हे. प्रभारी नेता लेके प्रभारी मंत्री तक ल समीकरन साधे के निरदेस देय गेहे.