लॉकडाउन म वरदान हे कबीरधाम के बाइक एंबुलेंस, संगी एक्सप्रेस के मदद ले 37 परिवार मन म गूंजिस किलकारी

जय जोहार कबीरधाम…. जिला के बाइक एंबुलेंस (संगी एक्सप्रेस) सेवा ह लॉकडाउन म गर्भवती महिला मन बर संजीवनी ले कम नई हे। ऊहां आजकल कोविड 19 के खतरा ले बचे बर चालक मन के तरफ ले घलो विशेष ध्यान दे जात हे। तेज बुखार, सर्दी, खांसी के मरीज मिले म तुरंत मुख्यालय ल सूचित कर टीम के माध्यम ले जांच करवाए जात हे अऊ ओखर बाद ही ओ मन ल गंतव्य तक पहुंचाए जात हे। लवइया मरीज के साबुन ले हाथ धुलवा के सैनिटाइज करवात हे अऊ मरीज के मुंह म कपड़ा बांध के सलाह घलो देत हे।

कबीरधाम जिला म पांच बाइक एंबुलेंस के माध्यम ले जिला के दुर्गम क्षेत्र के 150 ले अधिक गांव मन के लोग मन बर 15 जुलाई 2018 म बाइक एंबुलेंस सेवा ल साथी समाजसेवी संस्था के सहयोग ले शुरू करे गे रहिस। लॉकडाउन के समय म बाइक एंबुलेंस के मदद ले 37 परिवार मन म किलकारी गूंजे हे।

जिला कलेक्टर अवनीश कुमार शरन के अनुसार जिला के सुदूर ग्रामीण इलाका मन म जिहां गाड़ी मन ह नई पहुंच सकत, ऊहां बर बाइक एंबुलेंस सेवा ह लोग मन के तरफ ले पसंद करे जात हे। लाकडाउन के दौरान जच्चा-बच्चा ले लेके अन्य लोग मन ल एखर ले काफी मदद घलो मिले हे। जब सामान्य स्थिति हो जाही त निश्चित तौर म पांच एंबुलेंस ल बढ़ाए जा सकत हे।

जिला कार्यक्रम प्रबंधक कबीरधाम नीलू धृतलहरे ह बताइस कि लाकडाउन के दौरान जिला कलेक्टर अविनाश कुमार शरन ह पहाड़ी क्षेत्र मन के गर्भवती महिला, शिशु अऊ वृद्ध मन ल शीघ्र स्वास्थ्य सेवा मन ल उपलब्ध कराए के निर्देश दे हे। जिला म बाइक एंबुलेंस के सहयोग ले स्वास्थ्य केंद्र मन तक 37 गर्भवती महिला मन ल लाके संस्थागत प्रसव कराए गे हे।