कटोरा तालाब म मछरी मन के जीव के काल, अपने-अपन मरत हे.. बदबू ले परेशान रहवासी

रायपुर. राजधानी के कटोरा तालाब मछरी मन के जीव के काल आ गे हे। काबर कि अपने-अपन इहां बड़े तादात म मछरी मन के मऊत होत हे। हालात अतेक बेकाबू हो गे हे कि इहां के रहवासी अऊ इहां ले गुजरईया मन बदबू ले परेशान हे।

बता देन कि नगर निगम ह तरिया के तीर म बोर्ड घलो लगाए गे हे कि कचरा फेकने वाला मन ल नगर निगम ह जुर्माना वसूलही। फेर हालात उही जस के तस हे। अब सैकड़ों मछरी मन के मऊत ले इहां के पानी अऊ ज्यादा दूषित होत हे। संगे-संग बदबू घलो आवत हे। हालात ल काबू करे बर नगर निगम के कोनों पहल फिलहाल अभी तक नई देखे गे हे।

तरिया के पानी ह अतेक गंदा हो गे हे कि इहां मऊजूद अऊ मछरी मन के जीवन अधर म लटक गे हे। धीरे-धीरे अऊ मछरी मन मरत जात हे। बताए जात हे कि मछरी मन के मरे के कारण तालाब के पानी के प्रदूषित होना हे जेला लेके नगर निगम संजीदा नई हे। तरिया के बाहिर अऊ तरिया म आसपास के दुकानदार मन कचरा फेंक देथे ले पानी गंदा हो गे।