हुनरमंद हाथ के कलाकृति मन बनिन आकरसन के केन्द्र

रायपुर। विस्व युवा कौसल विकास दिवस के अवसर म आयोजित कौसल विकास परदरसनी म रायपुर संग प्रदेश के युवा मन के दिलचस्प झांकी मन ल देखे ल मिलीस। परदरसनी के आयोजन स्थानीय बूढ़ातालाब (विवेकानंद सरोवर) के आघू इंडोर स्टेडियम म करे गीस, जिहां छत्तीसगढ़ कौसल ओलम्पियाड 2018 म चुने गे प्रतिभागि मन ह कई ठन कलात्मक वस्तु मन के माध्यम ले अपन हाथ के हुनर के रोचक परदरसन करिन। मुख्यमंत्री के संग तकनीकी शिक्षा अऊ कौसल विकास मंत्री प्रेम प्रकाश पाण्डेय, कृषि अउ जल संसाधन मंत्री बृजमोहन अग्रवाल, लोक निर्माण मंत्री राजेश मूणत, संसदीय सचिव तोखन साहू, विधायक श्रीचन्द सुन्दरानी ह घलोक परदरसनी के अवलोकन करिन।
ये परदरसनी म दंतेवाड़ा के महिला स्वसहायता समूह मन कोति ले उत्पादित शहद, बेलमेटल, काष्ठ शिल्प के कलाकृति अऊ पैरा अउ धान ले तइयार सजावटी वस्तु मन घलोक मनखे मन के आकरसन के केन्द्र रहिस। बड़ संख्या म युवा मन के समूह स्टाल मन म जाके कलाकृति मन अऊ व्यावसायिक प्रसिक्छन प्रदाता संस्था मन के गतिविधि मन के जानकारी लेवत रहिन। स्टाल मन म कौसल उन्नयन प्राप्त युवा मन कोति ले तइयार कलाकृति मन अऊ चीज मन के संग कई ठन जिला मन म युवा मन ल व्यावसायिक प्रसिक्छन देवत संस्था मन ह घलोक मॉडल मन के माध्यम ले अपन गतिविधि मन ल प्रदरसित करत हें। मुख्यमंत्री डॉ. रमन सिंह ह स्टाल मन के अवलोकन के समय कई ठन व्यावसायिक प्रसिक्छन प्रदाता संस्था मन के प्रतिनिधि मन ले उंखर गतिविधि अऊ कौसल उन्न्यन प्रसिक्छन प्राप्त युवा मन ले ऊंखर काम-काज के बारे म जानकारी प्राप्त करिन।